Kərə yağı süd zülalına allergiyası, yüksək xolesterini və ürək-damar xəstəlikləri olan şəxslər üçün risk yarada bilər. Həmçinin artıq çəki problemi olanlar bu məhsulun qəbuluna diqqət yetirməlidirlər.
Ucnoqta.az xəbər verir ki, kərə yağı doymuş yağlarla zəngindir. Onun həddindən artıq istehlakı qanda “pis” xolesterinin səviyyəsini yüksəldə və ürək-damar xəstəlikləri riskinə təsir göstərə bilər.
Süd zülalına allergiyası olan şəxslərdə kərə yağı səpgi, qaşınma, şişkinlik və digər allergik reaksiyalara səbəb ola bilər. Buna görə belə insanlar həkim tövsiyələrinə əməl etməlidirlər.
Mütəxəssislər yüksək xolesterini və ürək-damar xəstəlikləri olan şəxslərə doymuş yağların qəbulunu məhdudlaşdırmağı, onların əvəzinə zeytun və günəbaxan yağı kimi bitki yağlarına üstünlük verməyi tövsiyə edirlər.
Kərə yağının 100 qramında təxminən 700–750 kilokalori var. Bu səbəbdən onun həddindən artıq qəbulu gündəlik kalori miqdarını artıraraq çəki artımına səbəb ola bilər.
Sağlam insanlar kərə yağını balanslaşdırılmış qidalanmanın bir hissəsi kimi az miqdarda qəbul edə bilərlər. Əsas məsələ ümumi qidalanma rejiminə diqqət yetirmək və doymuş yağların istehlakını məhdudlaşdırmaqdır.