Bir çox insanın ürəyinin bioloji yaşı faktiki yaşından yüksək olur. ABŞ alimləri ürək-damar xəstəlikləri riskini daha aydın qiymətləndirmək üçün yeni “ürək yaşı” simulyatoru hazırlayıblar.
Ucnoqta.az xəbər verir ki, bu barədə “JAMA Cardiology” jurnalında dərc olunan araşdırmada məlumat verilib.
“Northwestern University Feinberg School of Medicine” alimlərinin hazırladığı kalkulyator qan təzyiqi, xolesterin, diabet, siqaret istifadəsi və böyrəklərin vəziyyəti kimi göstəriciləri nəzərə alır.
14 mindən çox amerikalının məlumatlarının təhlili göstərib ki, iştirakçıların əksəriyyətində ürəyin bioloji yaşı faktiki yaşdan yüksəkdir. Araşdırmada qadınların orta faktiki yaşı 51,3, ürək yaşı isə 55,4 olub. Kişilərdə isə bu göstəricilər müvafiq olaraq 49,7 və 56,7 yaş təşkil edib.
Alimlər bildirirlər ki, ürəyin bioloji yaşının yüksək olması orqanın fiziki olaraq qocaldığını təsdiqləmir. Bu göstərici ürək-damar xəstəlikləri riskini daha anlaşıqlı şəkildə qiymətləndirməyə kömək edən vasitədir. Bununla belə, kalkulyator ailə xəstəlikləri tarixçəsi və bəzi iltihab göstəriciləri kimi bütün risk amillərini əhatə etmir.
Ürəyin bioloji yaşını necə azaltmaq olar?
Mütəxəssislərin fikrincə, ürək-damar sağlamlığını qorumaq üçün ilk növbədə yüksək qan təzyiqini və xolesterini nəzarətdə saxlamaq, siqaretdən imtina etmək və böyrəklərin sağlamlığına diqqət yetirmək lazımdır.
Sürətli gəzinti, üzgüçülük və velosiped sürmək kimi müntəzəm fiziki fəaliyyətlər, balanslaşdırılmış qidalanma, keyfiyyətli yuxu və stressin idarə olunması da mühüm əhəmiyyət daşıyır.
Ürək sağlamlığı üçün hansı qidalar faydalıdır?
Araşdırmalara əsasən, qoz-fındıq, yağlı dəniz balıqları, paxlalılar, yaşıl yarpaqlı tərəvəzlər, giləmeyvələr, zeytun yağı və tam taxıllı məhsulların müntəzəm istehlakı ürək-damar sağlamlığını dəstəkləyə bilər.
Eyni zamanda, həddindən artıq duz, rafinə şəkər, şirin içkilər və yüksək dərəcədə emal olunmuş qidaların qəbulunu azaltmaq tövsiyə edilir. Sağlam çəkinin qorunması, fiziki aktivlik və zərərli vərdişlərdən uzaq durmaq da ürək xəstəlikləri riskinin azaldılmasına kömək edir.