Yuxuya getməkdə çətinlik çəkən və ya gecə tez-tez oyanan insanlar axşam qidalanmasına diqqət yetirməlidirlər. Bəzi meyvələrin tərkibində yuxunun tənzimlənməsində iştirak edən melatonin, maqnezium və digər faydalı maddələr var.
Ucnoqta.az xəbər verir ki, bu barədə Verywell Health nəşri məlumat yayıb.
Mütəxəssislərin fikrincə, bəzi meyvələr axşam aclığını aradan qaldırmaqla yanaşı, gecə istirahətinin keyfiyyətinə də müsbət təsir göstərə bilər.
Yuxunu yaxşılaşdırmağa kömək edən 7 meyvə
1. Banan
Banan yuxu və rahatlama proseslərində iştirak edən triptofan amin turşusu ilə zəngindir. Bundan əlavə, tərkibindəki maqnezium və kalium gecə istirahətinin keyfiyyətinə müsbət təsir göstərə bilər. Mütəxəssislər bananı yatmazdan təxminən 1-2 saat əvvəl yeməyi tövsiyə edirlər.
2. Üzüm
Üzümün tərkibində yuxu və oyanıqlıq dövrlərini tənzimləyən melatonin hormonu var. Bu maddə giləmeyvənin həm lətində, həm qabığında, həm də toxumlarında mövcuddur.
Üzüm həmçinin antioksidant xüsusiyyətli resveratrolla zəngindir. Bu maddənin yuxunun müddətinə müsbət təsir göstərə və orqanizmdə iltihabi prosesləri azalda biləcəyi ehtimal olunur.
3. Kivi
Kivinin tərkibində də melatonin var. Peşəkar idmançıların iştirakı ilə aparılan bir araşdırmada yatmazdan bir saat əvvəl iki kivi yeyən iştirakçıların yuxu müddətinin artdığı və istirahət keyfiyyətinin yaxşılaşdığı müşahidə edilib.
Onların gecə oyanma hallarının da azaldığı bildirilib. Bununla belə, alimlər nəticələrin bütün insanlara şamil edilməsinin düzgün olmadığını vurğulayırlar.
4. Marakuya
Marakuya sinir sisteminin normal fəaliyyəti və əzələlərin rahatlaması üçün vacib olan maqneziumla zəngindir.
Bu meyvənin aid olduğu passiflora bitkisi də potensial sakitləşdirici xüsusiyyətləri ilə tanınır. Xüsusilə passiflora çayından yuxunu yaxşılaşdırmaq məqsədilə istifadə olunur.
5. Ananas
Ananas melatonin ehtiva edən meyvələrdən biridir. Bu hormon orqanizmin bioloji ritmlərinin, o cümlədən yuxu və oyanıqlıq dövrlərinin tənzimlənməsində mühüm rol oynayır.
6. Turş gilas
Xüsusilə Monmorensi sortuna aid turş gilas diqqət çəkir. Onun tərkibində daha keyfiyyətli gecə istirahətinə kömək edə bilən melatonin və triptofan var.
Elmi araşdırmaların icmalı turş gilasın yuxuya müsbət təsir göstərə biləcəyini ortaya qoyub. Lakin tədqiqat metodlarının fərqli olması səbəbindən hələlik qəti nəticə çıxarmaq üçün kifayət qədər sübut yoxdur.
Bu meyvəni təzə, dondurulmuş, konservləşdirilmiş və ya şirə şəklində qəbul etmək mümkündür.
7. Qarpız
Təxminən 92 faizi sudan ibarət olan qarpız orqanizmin maye balansının qorunmasına kömək edir. Bu, gecə susuzluq səbəbindən oyanan insanlar üçün faydalı ola bilər.
Bundan əlavə, qarpızın tərkibində maqnezium, kalium və yuxunun müddətinə, eləcə də keyfiyyətinə müsbət təsir göstərə biləcəyi ehtimal edilən likopen antioksidantı var.
Meyvələri yatmazdan əvvəl necə yemək lazımdır?
Mütəxəssislər axşam meyvə qəbulunu yatmazdan təxminən 1-2 saat əvvələ planlaşdırmağı tövsiyə edirlər. İstəyə görə bir neçə meyvəni qarışdıraraq meyvə salatı da hazırlamaq olar.
Lakin gecə tez-tez sidiyə getmək ehtiyacı səbəbindən oyanan insanlar qarpız kimi su miqdarı yüksək olan meyvələrin qəbulunu məhdudlaşdırmalıdırlar.
Şəkərli diabeti olan şəxslər isə gündəlik qidalanmada karbohidrat və şəkər miqdarını nəzərə almalıdırlar.
Qeyd edək ki, yalnız meyvə yemək keyfiyyətli yuxuya zəmanət vermir. Bunun üçün yatmaq və oyanmaq rejiminə əməl etmək, həmçinin yuxudan əvvəl elektron cihazlardan istifadəni məhdudlaşdırmaq da vacibdir.