Yuxu zamanı sol böyrü üstə uzanmağın ürəyə təzyiq göstərdiyi barədə geniş yayılmış fikirlər elmi əsaslara söykənmir. Mütəxəssislər bildirirlər ki, insan ürəyi döş qəfəsinin möhkəm sümük strukturu və elastik toxumalar tərəfindən qorunur.
Ucnoqta.az xəbər verir ki, bu barədə xarici mətbuatda dərc olunan materialda qeyd olunub.
Jersey Shore Universiteti Tibb Mərkəzinin kardioloqu və hemodinamika üzrə direktoru, doktor Renato Apolitonun sözlərinə görə, dərin yuxu, xüsusilə də REM mərhələsi qan damarlarının bərpası üçün mühüm əhəmiyyət daşıyır. Onun fikrincə, sol böyrü üstə yatmağın ürəyə zərər verdiyini təsdiqləyən elmi sübut yoxdur.
Mütəxəssislər ürəyin sağlamlığını qorumaq üçün vahid ideal yuxu pozasının olmadığını bildirirlər. Bununla belə, qarın üstə yatmaq tövsiyə edilmir. Bu vəziyyət boyun və bel nahiyəsində onurğaya əlavə gərginlik yarada bilər.
Ürəyin sağlamlığı baxımından əsas məqamlardan biri gecə ərzində rahat nəfəs almaqdır. Bu baxımdan, obstruktiv yuxu apnesi xüsusi diqqət tələb edir.
Hansı əlamətlərə diqqət yetirmək lazımdır?
Yuxu apnesinin əsas simptomları bunlardır:
Güclü və qeyri-müntəzəm xoruldama;
Yaxınların müşahidə etdiyi nəfəs fasilələri;
Gecə qəfil və səbəbsiz oyanmalar;
Uzun müddət yatdıqdan sonra belə yorğunluq və halsızlıq;
Səhərlər küt xarakterli baş ağrısı.
Yuxu apnesi gün ərzində halsızlığa səbəb ola bilər. Bundan əlavə, orqanizmdə oksigen çatışmazlığı və tez-tez baş verən mikroyuxu pozuntuları qan təzyiqini yüksəldə, qulaqcıqların fibrillyasiyası və ateroskleroz riskini artıra bilər.