Ətraf mühitin temperaturu normal olmasına baxmayaraq əllərinin və ya ayaqlarının daim soyuq olduğunu, tez-tez üşüdüyünü deyən insanların sayı az deyil. Tez-tez rast gəlinən bu hal diqqətdən kənarda saxlanılmamalıdır.
Ucnoqta.az bildirir ki, çünki davamlı üşümənin arxasında müxtəlif sağlamlıq problemləri dayana bilər.
Bəzi insanlar hava şəraitindən asılı olmayaraq daim üşüdüklərini və ya əl-ayaqlarının soyuq olduğunu bildirirlər.
Davamlı üşümənin əsas səbəbləri
Qısa müddət davam etdikdə bu hal əksər hallarda orqanizmin normal reaksiyası hesab olunur. Lakin uzun müddət davam edən üşümə zamanı qan dövranı və maddələr mübadiləsi ilə bağlı bəzi problemlərin araşdırılması lazım gələ bilər.
Dəmir çatışmazlığı və qanazlığı
Dəmir çatışmazlığı toxumalara oksigen daşınmasına təsir göstərərək halsızlıq, dərinin solğunlaşması və üşümə kimi şikayətlərə səbəb ola bilər. Xüsusilə davamlı yorğunluqla yanaşı müşahidə olunan soyuqluq hissi diqqətlə qiymətləndirilməlidir.
Qalxanabənzər vəzinin zəif işləməsi
Hipotireoz zamanı maddələr mübadiləsi yavaşladığı üçün orqanizm daha az istilik yarada bilər. Bu səbəbdən soyuğa həssaslıq xəstəliyin geniş yayılmış əlamətləri arasında yer alır.
B12 vitamini çatışmazlığı
B12 vitamini çatışmazlığı sinir sisteminə təsir göstərərək əllərdə və ayaqlarda keyimə, iynələnmə kimi hissiyyat dəyişikliklərinə səbəb ola bilər. Bəzi hallarda bu əlamətlər soyuğa qarşı həssaslıqla da müşayiət oluna bilər.
Diabet
Uzun müddət yüksək qan şəkəri səviyyəsi sinirlərə və kiçik damarlara zərər verə bilər. Xüsusilə ayaqlarda soyuqluq, keyimə və ya iynələnmə hissi bu baxımdan qiymətləndirilməlidir.
Daim üşümək öz-özlüyündə konkret xəstəliyin göstəricisi deyil. Lakin şikayət uzun müddət davam edirsə, gündəlik həyata təsir göstərirsə və ya keyimə, dəridə rəng dəyişikliyi, ciddi halsızlıq kimi digər əlamətlərlə birlikdə müşahidə olunursa, səbəbin müəyyənləşdirilməsi üçün həkimə müraciət etmək tövsiyə olunur.