Əti dondurucudan çıxardıqdan sonra planlar dəyişərsə, onu yenidən dondurmaq mümkündür. Lakin bunun təhlükəsiz olması üçün məhsulun necə əridildiyi əsas şərtdir.
Ucnoqta.az xəbər verir ki, əgər ət soyuducuda əridilibsə və bütün müddət ərzində soyuq temperaturda saxlanılıbsa, onu yenidən dondurmaq olar. Mütəxəssislər bildirirlər ki, bu zaman əsas problem qida təhlükəsizliyindən çox məhsulun keyfiyyətinin müəyyən qədər pisləşməsi ola bilər.
Ətin otaq temperaturunda əridilməsi isə təhlükəli hesab olunur. Çünki bu zaman məhsul bakteriyaların sürətlə çoxaldığı təxminən 4–60°C temperatur aralığına düşə bilər. Belə əti yenidən dondurmaq məsləhət görülmür.
Mikrodalğalı sobada əridilən ət də birbaşa yenidən dondurulmamalıdır. Sobada bəzi hissələr qismən bişə və ya qıza bilər. Bu halda ən təhlükəsiz variant əti əvvəlcə tam bişirmək, daha sonra hazır yeməyi dondurmaqdır.
Xüsusilə qiymə və quş əti ilə ehtiyatlı olmaq lazımdır. Onları yalnız soyuducuda tam əridildikdə və orada bir sutkadan artıq saxlanılmadıqda yenidən dondurmaq tövsiyə edilir.
Mütəxəssislər həmçinin qeyd edirlər ki, təkrar dondurulma ətin dadına və teksturasına təsir göstərə bilər. Dondurma zamanı əmələ gələn buz kristalları hüceyrələri zədələyir və məhsul əridikdə nəm itirir. Bu proses bir neçə dəfə təkrarlanarsa, ət daha quru və bərk ola bilər.
Bu səbəbdən əti kiçik porsiyalarla dondurmaq, qablaşdırmadan mümkün qədər çox havanı çıxarmaq məsləhətdir.
Ətin üzərində xoşagəlməz qoxu, selikli səth və ya qeyri-adi rəng yaranıbsa, onu istifadə etməkdənsə atmaq daha təhlükəsizdir.