Gürcüstan prezidenti Salome Zurabişvili hakim “Gürcü Arzusu – Demokratik Gürcüstan” partiyasının başlatdığı impiçment proseduru fonunda istefa vermək fikrində olmadığını bəyan edib.
Ucnoqta.az xəbər verir ki, Zurabişvili Gürcüstan İctimai Yayımının Birinci Kanalı tərəfindən yayımlanan televiziya açıqlamasında deyib.
"Mən heç yerə getmirəm. Düşünürəm ki, hamı istefa arzumu unutmalıdır. Mən olmalı olduğum yerdəyəm", – o, qeyd edib
Sentyabrın 1-də ölkənin hakim partiyası prezidentə qarşı impiçment prosedurunun başlandığını elan edib. Buna səbəb Zurabişvilinin Almaniya və Fransa prezidentləri, eləcə də hökumətin onu təkzib etdiyi Avropa Şurasının rəhbəri ilə görüşmək üçün Avropaya səfəri olub.
Prezidentin vəzifədən kənarlaşdırılması üçün parlamentdə səsvermənin nəticələrinə əsasən deputatların üçdə ikisinin, yəni 150-dən 100-nün səsi tələb olunur. Parlament çoxluğu 84 səsə malikdir.