Keçid dövrünün dəyişkən havası gün ərzində bir neçə dəfə geyimlə bağlı planları dəyişməyə məcbur edir. Belə havalarda yüngül üst geyimləri köməyə çatır.
Ucnoqta.az mütəxəssislərə istinadən temperaturun kəskin dəyişdiyi günlərdə rahatlıqla geyinə biləcəyiniz dəbli seçimləri təqdim edib.
Trençkot
Sərin səhər və ya axşam saatları üçün ideal seçimdir. Onu futbolka, top və ya yüngül paltarın üzərindən geyinmək olar. Trençkot istənilən obrazı daha maraqlı və cəlbedici göstərir.
Dəri gödəkçə
Səhərlər havanın artıq sərin olduğu, lakin isti palto geyinmək üçün hələ tez olduğu vaxtlarda əla seçimdir. Cins şalvar, yubka, don və hətta şortla da rahat kombin etmək mümkündür.
Bomber
Gündəlik obrazlar üçün yaxşı seçimdir. Dəyişkən hava üçün içliyi olmayan yüngül modellərə üstünlük vermək məsləhətdir. Belə gödəkçə səhər soyuğundan qorunmaq üçün kifayət edir.
Küləklik
Xüsusilə küləkli və yağışlı günlər üçün uyğundur. Yüngül olduğu üçün çantada çox yer tutmur. Futbolka, uzunqol köynək və ya hudinin üzərindən geyinərək idman üslubunu tamamlamaq olar.
Kardiqan
Səhərlər sərin, günorta isə hələ isti olan erkən payız günləri üçün əlverişlidir. Mayka və ya futbolkanın üzərindən geyinmək, günün ortasında isə çıxarıb çantaya qoymaq mümkündür.
Dəri pencək
Klassik dəri gödəkçəyə daha zərif alternativdir. Obraza xarakter qatır və həm klassik şalvar və yubka, həm də sadə cins şalvar və kedlərlə rahat uyğunlaşır.
Cins gödəkçə
Gün ərzində temperatur çox aşağı olmadıqda və kəskin dəyişmədikdə xüsusilə rahat seçimdir.
Köynək + hudi
Hava tamamilə qeyri-sabitdirsə, ən yaxşı variant bir neçə qat geyinməkdir. Məsələn, köynəyin üzərindən sviter və ya hudi geyinmək olar. Səhər bu kombin isti saxlayacaq, hava isindikdə isə üst qatı çıxarmaq mümkündür. Bu seçim xüsusilə buludlu günlərdə rahatdır.