Yer kürəsi dinozavrların yox olması dövründən bəri ən böyük ekoloji fəlakətlə qarşı-qarşıya qalıb.
Bu barədə Almaniyanın Krelefd Entomoloji Dərnəyinin bir qrup üzvü araşdırma aparıb. Qlobal yoxolmanın başlanğıcına dair bilgi toplayan alimlər xəbərdarlıq edir ki, bu ekoloji fəlakət Yer kürəsi tarixinin ən dəhşətlisi olacaq.
Dünyanın müxtəlif bölgələrinin faunasında son 40 ildə meydana gələn dəyişikliklərlə bağlı genişmiqyaslı araşdırma aparan alman entomoloqlar 30 il ərzində Ren çayının sahillərində 63 yerdə qurduqları tələyə düşən böcəkləri müşahidə edib. 80 milyondan çox böcək toplayan araşdırmaçılar heyvan növlərinin üçdən ikisini əhatə edən ayaqlı həşəratların sürətli şəkildə öldüyünü görüb. 1994-cü ildən bəri davam edən araşdırma ərzində uçan həşəratların ümumi biokütləsinin 76% azaldığı üzə çıxıb.
Alimlər bildirir ki, Qərbi Avropada bioloji çeşidliliyin kritik səviyyədə azalması ekosistemlər və qida zəncirləri üçün fəlakətə bərabər nəticələrə yol açacaq. Nəticədə qida müxtəlifliyi və sayı azalacaq./publika.az