Səhər qəhvəsini qaragilə, moruq və qozla birlikdə qəbul etməyin sağlamlıq üçün faydaları açıqlanıb.
Ucnoqta.az xəbər verir ki, dietoloq Oksana Skitalinskayanın sözlərinə görə, giləmeyvələr vitamin, antioksidant və liflə zəngin olsa da, onların əsas faydalarından biri tərkibindəki polifenolların bağırsaq bakteriyaları ilə qarşılıqlı təsirindədir. Bu maddələr hüceyrələrin yenilənməsinə kömək edir, damarları, ürəyi və beyni dəstəkləyir.
Skitalinskaya gündəlik səhər rasionuna əridilmiş qaragilə və moruq, 30 qram qoz və şəkərsiz qəhvə daxil etməyi tövsiyə edir.
Dietoloq bildirir ki, polifenolların təxminən 90 faizi yoğun bağırsağa çatır və burada bağırsaq bakteriyaları tərəfindən emal olunur. Moruq və qozun tərkibindəki maddələrdən isə bakteriyalar urolitin A istehsal edə bilir. Bu birləşmə hüceyrələrdə köhnəlmiş mitoxondrilərin yenilənməsi prosesini stimullaşdırır.
Mütəxəssisin təqdim etdiyi məlumatlara əsasən:
– 2 saat ərzində: qaragilə qəbulundan sonra damarların genişlənmə qabiliyyəti yaxşılaşa bilər.
– 3 həftə ərzində: qozun müntəzəm qəbulu faydalı bağırsaq bakteriyalarının sayını 49–160 faiz artıra, “pis” xolesterini isə 7 faiz azalda bilər.
– 4 həftə ərzində: hər gün qaragilə yemək arterial təzyiqin təxminən 5 mm civə sütunu azalması ilə əlaqələndirilir.
– 3 ay ərzində: qaragilə yaşlı insanlarda yaddaşın yaxşılaşmasına, urolitin A isə əzələ dözümlülüyünün artmasına və iltihabın azalmasına kömək edə bilər.
– Uzun müddətdə: gündə 3–4 fincan qəhvə içmək bütün səbəblərdən ölüm riskinin 17 faiz aşağı olması ilə əlaqələndirilir.
Skitalinskayanın sözlərinə görə, kofein insana enerji verir, giləmeyvələrin tərkibindəki lif və qozdakı yağlar isə bu enerjinin daha uzun müddət qorunmasına kömək edir.
Dietoloq qeyd edib ki, bəzi insanların bağırsaq bakteriyaları urolitin A-nı kifayət qədər istehsal etmir. Dəmir çatışmazlığı olan şəxslərə isə qəhvəni yeməkdən bir saat sonra içmək tövsiyə olunur.
O, həmçinin dondurulmuş giləmeyvələrin təzə məhsullardan geri qalmadığını və əridikdən sonra qabda qalan şirənin də içilməli olduğunu bildirib.