Müasir dövrdə unutqanlıq problemi yalnız yaşlı insanlarda deyil, gənclər arasında da daha çox müşahidə olunur.
Ucnoqta.az xəbər verir ki, nevroloq, doktor Büşra Er gənclərdə unutqanlığın əsas səbəbləri, risk faktorları və problemdən qorunma yolları barədə danışıb.
Mütəxəssisin sözlərinə görə, əvvəllər əsasən yaşlı insanlarda rast gəlinən unutqanlıq şikayətləri indi hətta yeniyetmələr arasında da müşahidə olunur.
“Unutmaq məlumatı yadda saxlamaq və ya sonradan xatırlamaqda çətinlik kimi müəyyən edilir. Yuxu rejiminin pozulması, düzgün qidalanmama, diqqət çatışmazlığı və depressiya ilə yanaşı, rəqəmsal mediadan istifadə də bu vəziyyəti gücləndirir”, – deyə Büşra Er bildirib.
Alman neyroalim Manfred Spitzerin irəli sürdüyü “rəqəmsal demensiya” anlayışına diqqət çəkən həkim xüsusilə gənclərdə ekran qarşısında keçirilən vaxtın artmasının diqqət və yaddaş funksiyalarına mənfi təsir göstərə biləcəyini vurğulayıb.
Onun sözlərinə görə, davamlı olaraq müxtəlif stimullara məruz qalmaq, məlumatlara həddindən artıq asan çıxış və ekranlardan yayılan mavi işığın yuxu hormonlarının ifrazını azaltması zehni fəaliyyətdə passivliyə səbəb ola bilər.
Mütəxəssis yaşlı insanlarda unutqanlığın ən çox rast gəlinən səbəblərindən biri olan Alzheimer xəstəliyi ilə bağlı yanlış təsəvvürlərə də toxunub.
“Bir insanın ailəsində Alzheimer xəstəsinin olması genetik meyli düşündürə bilər. Lakin Alzheimerin irsi formaları bütün halların 1 faizindən də azını təşkil edir. Genetik testlər rutin şəkildə tövsiyə olunmur”, – deyə həkim qeyd edib.
Büşra Er unutqanlığın bəzi səbəblərinin qarşısının alına biləcəyini bildirib. Bunun üçün rəqəmsal media və ekran qarşısında keçirilən vaxtı məhdudlaşdırmaq, nizamlı yatmaq, sağlam qidalanmaq, kitab oxumaq, krossvord və digər tapmacalar həll etmək, yaddaş oyunlarından istifadə etməklə beyni aktiv saxlamaq tövsiyə olunur.