Diabet hər zaman aşkar şikayətlərlə özünü göstərmir. Xüsusilə 2-ci tip diabet və diabetdən əvvəlki mərhələ hesab olunan prediabet insan özünü sağlam hiss etdiyi halda uzun müddət gizli şəkildə inkişaf edə bilər.
Ucnoqta.az xəbər verir ki, endokrinoloq, uzman həkim Melek Aksu Geyik bildirib ki, 2-ci tip diabetdə simptomlar tədricən ortaya çıxa bilər. Onun sözlərinə görə, insanın özünü yaxşı hiss etməsi xəstəliyin olmadığı anlamına gəlmir.
Qanda şəkərin yüksək olması bəzi insanlarda aşağıdakı əlamətlərlə özünü göstərə bilər:
həddindən artıq susuzluq və tez-tez sidiyə getmə;
davamlı halsızlıq və tez-tez aclıq hissi;
görmənin bulanıqlaşması;
səbəbsiz çəki dəyişiklikləri;
yaraların gec sağalması;
əl və ayaqlarda keyimə və ya iynələnmə;
təkrarlanan infeksiyalar.
Boyun və qoltuqaltındakı tündləşməyə diqqət
Boyun və qoltuqaltı kimi büküş nahiyələrində yaranan məxmərəbənzər tündləşmələr də diqqət tələb edən əlamətlərdən biri ola bilər. Həkim bu vəziyyətin tibbdə akantozis nigrikans adlandırıldığını və insulin müqaviməti ilə əlaqəli ola biləcəyini bildirib.
Ailəsində diabet olan, artıq çəkidən əziyyət çəkən, hərəkətsiz həyat tərzi keçirən və yaşlı insanların daha diqqətli olması tövsiyə edilir. Risk qrupunda olan şəxslər hər hansı əlamətin ortaya çıxmasını gözləmədən mütəmadi tibbi müayinələrdən keçməlidirlər.
Həkim vurğulayıb ki, diabet diaqnozu yalnız simptomlara əsasən qoyulmur. Bunun üçün müxtəlif qan şəkəri testlərindən istifadə edilir.
HbA1c testi təxminən son üç ay ərzində qanda orta şəkər səviyyəsi barədə məlumat verir. HbA1c göstəricisinin 5,7-6,4 faiz arasında olması prediabet, 6,5 faiz və ya daha yüksək olması isə diabet baxımından qiymətləndirilir. Lakin dəqiq diaqnoz lazımi analizlər və klinik qiymətləndirmə əsasında həkim tərəfindən qoyulmalıdır.
Mütəxəssisin sözlərinə görə, diabetin erkən mərhələdə aşkarlanması xəstəliyə nəzarət baxımından böyük əhəmiyyət daşıyır. Sağlam qidalanma, müntəzəm fiziki aktivlik və zəruri hallarda çəkiyə nəzarət diabet riskinin azaldılmasına kömək edə bilər.