İnformasiya Kommunikasiya Texnologiyaları Agentliyi (İKTA) tərəfindən sabit internet xidmətlərinin keyfiyyətinin qiymətləndirilməsi məqsədilə keçirilən sorğuda bu günədək 33 mindən çox vətəndaş iştirak edib.
İKTA-dan Ucnoqta.az-a verilən xəbərə görə, 23 iyul 2026-cı il tarixində başlayan sorğu həm onlayn, həm də ölkə üzrə fəaliyyət göstərən “ASAN xidmət” və “Azərpoçt” mərkəzlərində üzbəüz formatda davam etdirilir.
Sorğunun əsas məqsədi sabit internet istifadəçilərinin xidmət keyfiyyəti ilə bağlı real təcrübəsini öyrənmək, istehlakçıların qarşılaşdığı əsas çətinlikləri və gözləntiləri, habelə məmnunluq səviyyəsinə təsir edən amilləri birbaşa istifadəçi rəyi əsasında qiymətləndirməkdir.
Sorğu 6 bölmə üzrə 20-dən artıq sualı əhatə edir və cavablandırılması bir neçə dəqiqə vaxt tələb edir. Suallar əsasən internet bağlantısının sürəti və dayanıqlığı, axşam saatlarında xidmət keyfiyyəti, qiymət-keyfiyyət uyğunluğu, texniki nasazlıqların aradan qaldırılma müddəti, provayderlərlə kommunikasiya və müştəri xidmətlərinin keyfiyyəti kimi mühüm mövzuları əhatə edir.
Sorğu Vətəndaşlara Xidmət və Sosial İnnovasiyalar üzrə Dövlət Agentliyi (VXSİDA) ilə əməkdaşlıq çərçivəsində ölkə üzrə fəaliyyət göstərən bütün “ASAN xidmət” mərkəzlərində də keçirilib. Prosesə ASAN könüllüləri cəlb olunub, bununla yanaşı, “Azərpoçt” MMC-nin xidmət mərkəzləri vasitəsilə də vətəndaşlara sorğuda iştirak imkanı yaradılıb.
İKTA istehlakçı məmnuniyyətini mütəmadi olaraq müxtəlif mənbələrdən daxil olan müraciətlər, “E-Şikayət” sistemi, texniki ölçmələr və monitorinqlər vasitəsilə izləyir. Keçirilən sorğunun nəticələri bu məlumatlarla birlikdə kompleks şəkildə təhlil ediləcək və sabit internet xidmətlərinin keyfiyyətinin artırılması, mövcud çatışmazlıqların müəyyənləşdirilməsi və tənzimləmə tədbirlərinin təkmilləşdirilməsi üçün mühüm informasiya bazası rolunu oynayacaq.
İKTA sabit internet xidmətlərindən istifadə edən bütün vətəndaşları sorğuda fəal iştirak etməyə və öz istifadəçi təcrübələrini bölüşməyə çağırır.
Onlayn sorğu sentyabrın 20-dək davam edəcək.
Sorğuda onlayn iştirak etmək üçün aşağıdakı keçiddən istifadə edə və ya təqdim olunan QR koddan istifadə edə bilərsiniz:
https://forms.gle/hrquwN8vVYbjaU739