Mobil telefon, planşet və kompüterdən istifadə zamanı uzun müddət önə əyilmiş vəziyyətdə qalmaq boyun ağrılarını və duruş pozğunluqlarını artıra bilər.
Ucnoqta.az xəbər verir ki, mütəxəssis Şəniz Akçayın sözlərinə görə, başın uzun müddət önə əyilməsi boyun fəqərələri və əzələlərin normaldan 4-5 dəfə artıq yük daşımasına səbəb olur.
Onun sözlərinə görə, boyun ağrısı dayaq-hərəkət sistemi problemləri arasında ən çox rast gəlinən şikayətlərdəndir. Bu problem uşaqlarda, gənclərdə, böyüklərdə və yaşlılarda müşahidə olunur. Hərəkətsiz həyat tərzinin geniş yayılması, uyğun olmayan ofis şəraiti, eləcə də telefon, planşet və kompüterdən istifadə müddətinin artması boyun ağrılarının daha çox görülməsinə səbəb olur.
Mütəxəssis bildirib ki, bir sıra sadə tədbirlər texnoloji cihazlardan istifadənin yaratdığı boyun ağrısı və duruş pozğunluğu riskini əhəmiyyətli dərəcədə azalda bilər.
İstifadə olunan cihazdan asılı olmayaraq, ekranın hündürlüyü baş və boyun vəziyyətinə uyğun tənzimlənməlidir. Stolüstü kompüterin monitoru göz səviyyəsində və təxminən bir qol məsafəsində yerləşdirilməlidir. Lazım gəldikdə daha böyük monitorlardan, ayrıca klaviaturadan, həmçinin noutbuk, planşet və telefon üçün yüksəldici stendlərdən istifadə etmək tövsiyə olunur.
İnsan başını dik saxladıqda boyun təxminən başın öz ağırlığını daşıyır. Yetkin insanın başının çəkisi orta hesabla 5 kiloqramdır. Lakin baş uzun müddət önə əyildikdə boyuna düşən yükün 25 kiloqrama qədər arta biləcəyi bildirilir.
Bu vəziyyət bədənin yuxarı hissəsinin önə doğru əyilməsinə, çiyinlərin irəli düşməsinə və duruş pozğunluğuna səbəb ola bilər. Uzunmüddətli yanlış duruş fəqərələrarası disklərə əlavə yük salaraq boyun yırtığı kimi problemlərin yaranmasına şərait yarada bilər.
Boyun ağrısından qorunmaq üçün nə etmək lazımdır?
Uzun müddət kompüter, telefon və digər texnoloji cihazlardan istifadə edən insanların hər 20-30 dəqiqədən bir ayağa qalxması, qısa məsafə də olsa gəzməsi və bədən vəziyyətini dəyişməsi tövsiyə olunur.
Həmçinin çənəni yüngül şəkildə geriyə çəkmək, kürək sümüklərini arxaya toplamaq, çiyinləri geriyə doğru çevirmək və sadə boyun hərəkətləri etmək faydalı ola bilər.
Mütəxəssis qeyd edib ki, gün ərzində daim dik oturmaq mümkün deyil. Buna görə də əsas məqsəd uzun müddət eyni vəziyyətdə qalmamaq və tez-tez sağlam pozisiyaya keçməkdir.
Əks halda boyun ağrılarının artması və şiddətlənməsi, boyun yırtığı, boyun əyriliyinin düzləşməsi və bəzi hallarda onurğa kanalının daralması kimi problemlərin yaranma riski arta bilər. Uzun müddət düzgün olmayan vəziyyətdə qalmaq boyun və kürək nahiyəsində xalq arasında «kulunç» kimi tanınan ağrılı əzələ sindromunun yaranmasına da şərait yarada bilər.