Meyvələr ən faydalı qida məhsullarından biri hesab olunur. Onlar vitaminlər, minerallar, antioksidantlar və liflə zəngindir. Lakin faydalı qidalar belə müəyyən miqdarda qəbul edilməlidir.
Ucnoqta.az bildirir ki, mütəxəssislər qeyd edirlər ki, meyvələrdən həddindən artıq istifadə arzuolunmaz nəticələrə səbəb ola bilər.
Ümumdünya Səhiyyə Təşkilatı (ÜST) gündə ən azı 400 qram tərəvəz və meyvə qəbul etməyi tövsiyə edir. Lakin burada söhbət onların ümumi miqdarından gedir. Tərəvəzlərə üstünlük verilməsi məsləhətdir: böyüklərin gündə təxminən 300–400 qram tərəvəz, 200–300 qram isə meyvə və giləmeyvə qəbul etməsi məqsədəuyğun sayılır.
Bu, məsələn, iki orta ölçülü alma, bir banan və kiçik porsiya giləmeyvə ola bilər. Belə miqdar orqanizmi lazımi vitamin və liflə təmin etməyə, eyni zamanda şəkər və karbohidratların həddindən artıq qəbulunun qarşısını almağa kömək edir.
Bütöv meyvələr şirələrdən daha faydalıdır. Meyvələrdəki şəkərlər liflə birlikdə olur. Lif şəkərlərin mənimsənilməsini ləngidir və qanda qlükoza səviyyəsinin kəskin yüksəlməsinin qarşısını almağa kömək edir. Şirələrdə isə lifin böyük hissəsi olmur. Buna görə hətta təzə sıxılmış şirələrdə də kifayət qədər çox sərbəst şəkər olur. Bu səbəbdən mütəxəssislər gündə bir stəkan şirə ilə məhdudlaşmağı tövsiyə edirlər.
Meyvələrin həddindən artıq qəbulu bir sıra problemlərə səbəb ola bilər:
Artıq kalori. Məsələn, 1 kiloqram bananda təxminən 960 kilokalori və 200 qramdan çox karbohidrat var.
Həzm problemləri. Böyük miqdarda lif və fruktoza qarında köp, qurultu və ishala səbəb ola bilər.
Qidalanma balansının pozulması. Əsas qida qəbulunu meyvələrlə əvəz etmək orqanizmin zülallar, faydalı yağlar, dəmir və digər vacib maddələri kifayət qədər almasına mane ola bilər.
Beləliklə, meyvələr sağlam qidalanmanın vacib hissəsidir, lakin onların qəbulu da müəyyən həddə olmalıdır. Düzgün qidalanmanın əsas prinsipi müxtəlif və balanslı menyu yaratmaq, tərəvəz, meyvə, zülal, yağ və kompleks karbohidratları uyğun şəkildə qəbul etməkdir.