Siciliyada yerləşən Kataniya hava limanı Etna vulkanının aktivliyinin davam etməsi və kül püskürməsi səbəbindən təyyarələrin qəbuluna yenidən bağlanıb.
Ucnoqta.az xəbər verir ki, yerli Mülki Aviasiya İdarəsinin məlumatına görə, hava limanı saat 17:00-dək reysləri qəbul etməyəcək.
Milli Geofizika və Vulkanologiya İnstitutunun məlumatına əsasən, vulkanın intensiv aktivliyi səbəbindən aviasiya üçün xəbərdarlıq ən yüksək – qırmızı səviyyədə saxlanılır.
Qeyd olunub ki, hazırkı püskürmə mərhələsi yüksək kül sütunlarının yaranması ilə müşayiət olunan partlayış xarakterli aktivliklə müşahidə edilir. Eyni zamanda, vulkanın 2 750 və 2 360 metr yüksəklikdə yerləşən kraterlərində mürəkkəb lava sahələri formalaşır.
Etna Avropanın aktiv vulkanlarından biridir və onun fəaliyyəti daim müşahidə olunur. Bir qayda olaraq, vulkanın aktivliyi əhali üçün təhlükə yaratmır və ciddi şəkildə monitorinq edilir.