Moldova hökuməti qonşu Ukraynadan uçan kiçik dronları aşkar edib vura bilən hava hücumundan müdafiə sistemləri alacaq.
Ucnoqta.az xəbər verir ki, bunu Moldovanın TV-8 telekanalına müsahibəsində Moldovanın baş naziri Dorin Reçan deyib.
Baş nazir bildirib ki, Moldova ərazisinə düşə biləcək pilotsuz təyyarələr partlayıcı maddə daşımadığı üçün partlayış baxımından təhlükə yaratmır.
"Bununla belə, onlar evlərin üzərinə yıxıldıqda və ya bir insana dəydikdə, xəsarət və ya hətta ölümlə nəticələnə bilən təhlükəli ola bilər.
Birinci mərhələdə biz raketlər və partlayıcı maddələr daşıyan pilotsuz təyyarələr kimi ən təhlükəli hava təhdidlərini aşkar etmək və vurmaq imkanları əldə etdik. Bu, hələ də məhdud imkandır, lakin biz artıq daha mürəkkəb təhdidlərin öhdəsindən gəlmək üçün müdafiəmizi təkmilləşdirməyə başlamışıq.
Gələcəkdə biz partlayıcı maddə daşımayan daha kiçik və daha az təhlükəli pilotsuz təyyarələrin aşkarlanması və məhv edilməsi üçün vasitələrə sərmayə qoymalı olacağıq”, – Reçan qeyd edib.