Qanq çayında qayıq batdı, 13 uşaq öldü

Hindistanda Qanq çayında qayığın batması nəticəsində azı 13 uşaq həlak olub.

Ucnoqta.az xəbər verir ki, hadisə ölkənin şimal-şərqində yerləşən Bihar ştatının Vaişali rayonunda baş verib.

Yerli administrasiyanın rəhbəri Varşi Sinqhin jurnalistlərə verdiyi məlumata görə, hadisə zamanı qayıqda əsasən uşaqlar olmaqla 15-20 nəfər olub. Həlak olanların hamısı 15 yaşdan kiçik uşaqlardır.

Məlumata görə, sərnişinlər çayın digər sahilində yerləşən kənddə keçirilən bayrama gedərkən qayıq aşıb.

Hadisə yerində axtarış-xilasetmə əməliyyatı davam edir.

İndiyədək yeddi uşaq xilas edilib. Onlar xəstəxanaya yerləşdirilib və vəziyyətlərinin stabil olduğu bildirilir.