ABŞ-ın dizel yanacağının ixracına mümkün məhdudiyyət tətbiq etməsi Avropada qiymətlərin kəskin bahalaşmasına səbəb ola bilər.
Ucnoqta.az xəbər verir ki, bu barədə CNBC məlumat yayıb.
Britaniyanın “Argus Media” analitik şirkətinin Avropa üzrə qiymət siyasəti şöbəsinin rəhbəri Benedikt Corcun sözlərinə görə, ABŞ-ın dizel ixracına məhdudiyyət qoyması Avropada yanacağın qiymətini “misli görünməmiş səviyyəyə” yüksəldə bilər.
Onun sözlərinə görə, son aylarda Avropaya idxal olunan dizelin təxminən yarısı ABŞ-ın payına düşüb. Buna görə də mümkün ixrac məhdudiyyətləri Avropa bazarına ciddi təsir göstərə bilər.
Bununla belə, Corc vurğulayıb ki, hazırda ABŞ tərəfindən hər hansı konkret tədbir görülməyib və belə məhdudiyyətlərin tətbiq ediləcəyinin, yaxud hansı formada olacağının özü də qeyri-müəyyəndir.
CNBC qeyd edir ki, Avropadakı bir çox neft treyderi Vaşinqtonun belə addım atacağına şübhə ilə yanaşır. Onların fikrincə, bu qərar ABŞ-ın neft şirkətləri üçün də ciddi çətinliklər yarada bilər.
Corcun sözlərinə görə, mümkün məhdudiyyətlərin tətbiqi halında onların iki-üç aydan çox davam etməyəcəyi ehtimal edilir.