Qırğızıstanda İssık-Kul gölünün dibində orta əsrlərə aid yaşayış məskəninin qalıqları aşkar edilib.
Ucnoqta.az xəbər verir ki, arxeoloqlar gölün şimal-qərb sahilində, Toru-Ayqır kəndi yaxınlığında aparılan araşdırmalar zamanı şəhərin qalıqlarını aşkarlayıblar. Xarabalıqlar cəmi 1-4 metr dərinlikdə yerləşir.
Araşdırmalar zamanı bişmiş kərpicdən tikilmiş tikililər, daş divarlar, taxta konstruksiyalar və taxıl üyütmək üçün istifadə olunan dəyirman daşı tapılıb. Ərazidə həmçinin məscid, mədrəsə və ya hamam olduğu ehtimal edilən ictimai tikilinin qalıqları müəyyən olunub.
Arxeoloqlar təxminən 5,7 hektarlıq müsəlman qəbiristanlığının izlərini də aşkar ediblər. İki insanın qalıqları isə müsəlman adətlərinə uyğun, üzü Məkkəyə istiqamətlənmiş şəkildə dəfn olunub.
Tədqiqatçılar şəhərin tarixini X əsrdə başlayan Qaraxanlılar dövrü ilə əlaqələndirirlər. Onların fikrincə, yaşayış məskəni İpək Yolunun mühüm ticarət şəbəkəsinin bir hissəsi olub.
Şəhərin nə üçün su altında qalması isə hələ dəqiq müəyyən edilməyib. Əsas versiyalardan biri XV əsrin əvvəllərində baş vermiş güclü zəlzələdir. İssık-Kul ətrafının seysmik aktiv Tyan-Şan bölgəsində yerləşməsi bu ehtimalı gücləndirir.
Bununla belə, alimlər şəhərin su altında qalmazdan əvvəl qismən tərk edilmiş ola biləcəyini də istisna etmirlər. Götürülən torpaq, ağac və digər nümunələrin araşdırılmasından sonra şəhərin tarixçəsi və məhv olma səbəbi barədə daha dəqiq məlumat əldə ediləcəyi gözlənilir.