Payız və qış aylarında hava şəraitinin dəyişməsi, qapalı və izdihamlı məkanlarda daha çox vaxt keçirilməsi göz sağlamlığına təsir göstərə bilər. İctimai nəqliyyatda infeksiya riski artır, kondisionerli ofislər və uzun müddət ekran qarşısında qalmaq isə göz quruluğu və qızartı kimi problemlərə səbəb ola bilər.
Ucnoqta.az bildirir ki, göz Sağlamlığı və Xəstəlikləri üzrə mütəxəssis Op. Dr. Adnan İpçioğlu bu dövrdə gözlərə daha çox diqqət yetirməyin vacibliyini bildirib. Onun sözlərinə görə, avtobus, tramvay və digər ictimai nəqliyyat vasitələrində insanların sıx təmasda olması göz infeksiyalarının yayılmasını asanlaşdıra bilər.
Gözlərdə qızartı, qaşınma və ya çirkələnmə müşahidə edildikdə şikayətlərə laqeyd yanaşmamaq və göz həkiminə müraciət etmək tövsiyə olunur. Həkim tərəfindən təyin olunan dərmanların da göstərilən müddət ərzində müntəzəm istifadə edilməsi vacibdir.
Uzun müddət kompüter qarşısında işləyənlərdə də göz quruluğu və yorğunluğu daha çox müşahidə oluna bilər. Kondisioner havanı qurudaraq göz səthində nəmin azalmasına səbəb olur. Belə hallarda həkim məsləhəti ilə nəmləndirici göz damcılarından istifadə edilə bilər.
Mütəxəssis ekran qarşısında çalışan şəxslərə gözlərini mütəmadi olaraq dincəltməyi və kompüter, planşet və telefon istifadəsini balanslaşdırmağı tövsiyə edir. Uzun müddət ekrana baxmaq göz qırpma tezliyini azaltdığından quruluq və yorğunluq hissini artıra bilər.
Günəş eynəyinin yalnız yay aylarında istifadə edilməli olduğu düşüncəsi də doğru deyil. Günəş şüaları payız və qış aylarında da gözlərə təsir göstərə bilər. Xüsusilə açıq havada işləyən və uzun müddət avtomobil idarə edən şəxslərə günəşli havalarda uyğun günəş eynəyi taxmaq tövsiyə olunur.
Mütəxəssislər qızartı, qaşınma, çirkələnmə və quruluq kimi əlamətləri sadəcə göz yorğunluğu kimi qiymətləndirməməyi məsləhət görürlər. Şikayətlər davam edərsə və ya güclənərsə, həkim müayinəsindən keçmək lazımdır.
Göz sağlamlığını qorumaq üçün əsas tövsiyələr:
İzdihamlı məkanlarda gigiyena qaydalarına əməl edin;
Kondisionerli mühitlərdə göz quruluğunun qarşısını almağa çalışın;
Ekran qarşısında fasilələr verin;
Gözləri mütəmadi olaraq dincəldin;
Günəşli havalarda uyğun günəş eynəyindən istifadə edin;
Davamlı göz şikayətləri olduqda həkimə müraciət edin.