ABŞ Prezidenti Donald Trampın administrasiyası Beynəlxalq Cinayət Məhkəməsinə (BCM) qarşı genişmiqyaslı yeni sanksiyalar tətbiq etməyə hazırlaşır.
Ucnoqta.az xəbər verir ki, bu barədə The Wall Street Journal məlumat yayıb. Məlumatı Reuters də yayımlayıb və qeyd edib ki, agentlik WSJ-nin məlumatlarını müstəqil şəkildə təsdiqləyə bilməyib.
Nəşrin məlumatına görə, yekun qərarın nə vaxt elan ediləcəyi hələ məlum deyil. ABŞ administrasiyasının adı açıqlanmayan rəsmiləri məsələ ilə bağlı aydınlığın yaxın bir həftə ərzində yarana biləcəyini bildiriblər.
Planlaşdırılan məhdudiyyətlərin BCM ilə həyata keçirilən maliyyə əməliyyatlarının əksəriyyətinə şamil ediləcəyi bildirilir. Bununla belə, sanksiyaların qüvvəyə minməsindən əvvəl 6-7 aylıq keçid müddətinin nəzərdə tutulduğu qeyd olunur.
WSJ yazır ki, dollarla əməliyyatların və beynəlxalq maliyyə sisteminin böyük hissəsinə çıxışın məhdudlaşdırılması məhkəmənin fəaliyyətinə ciddi təsir göstərə bilər. Rabitə xidmətləri ilə bağlı maliyyə əməliyyatlarının isə məhdudiyyətlərdən istisna edilə biləcəyi bildirilir.
ABŞ artıq BCM-nin bir sıra rəsmilərinə qarşı fərdi sanksiyalar tətbiq edib. Son olaraq avqustun 18-də məhkəmənin prezidenti Tomoko Akane və baş prokuror yanında yüksək vəzifəli hüquqşünas Abdoulaye Seye sanksiya siyahısına salınıb.