UEFA, KONKAKAF və AFC FIFA prezidenti Canni İnfantinonun dünya çempionatına dair hüquqların bir hissəsinin özəl investorlara satılması təklifi ilə bağlı fəaliyyətinin müstəqil araşdırılmasını tələb edib.
Ucnoqta.az xəbər verir ki, bu barədə üç konfederasiyanın UEFA-nın saytında yayımlanan açıq məktubunda bildirilib.
Təşkilatlar hesab edir ki, məsələ ilə bağlı araşdırma FIFA tərəfindən aparılmamalıdır. Onların fikrincə, qurum prosesin nəticəsində maraqlı tərəf ola bilər.
UEFA, KONKAKAF və AFC qeyd edib ki, FIFA-nın son açıqlamasında proses zamanı yol verilən səhvlər “anlaşılmazlıq” kimi təqdim olunub. Lakin konfederasiyalar bunun sadəcə prosedur xətası deyil, futbol qurumlarına olan etimadın ciddi şəkildə pozulması olduğunu vurğulayıb.
Onlar araşdırmanın FIFA administrasiyasından və digər maraqlı tərəflərdən tamamilə müstəqil üçüncü qurum tərəfindən aparılmasını tələb ediblər.