UEFA Millətlər Liqasının qrup mərhələsinin 3-cü turunda Azərbaycan yığması həvəskar futbolçulardan formalaşan Lixtenşteynə qalib gələ bilmədi. Bakıda keçirilən oyun 0:0 hesabı ilə nəticələndi.
Bu oyundan sonra sosial mediada yığmanın futbolçuları və AFFA rəhbərliyi kəskin tənqid olunur.
Milyonlar qazanan azərbaycanlı futbolçuların çilingər və dülgərlərdən ibarət həvəskarlara qalib gələ bilməməyi azarkeşləri qəzəbləndirib.
Gözləmək olardı ki, AFFA bu heç-heçəyə görə futbolçulara mükafat verməyəcək. Amma…
Ucnoqta.az xəbər verir ki, Publika.az-ın AFFA-dakı mənbədən əldə etdiyi məlumata görə, AFFA rəhbərliyi fərqli qərar verib. Lixtenşteynlə oyundakı heç-heçəyə görə futbolçular mükafatlandırılcaq, özü də böyük məbləğdə.
Start heyətində meydana çıxan hər bir oyunçu 15 min, sonradan meydana daxil olanlar 10 min, ehtiyatda qalanlar isə 7 min manat mükafat alacaq.
AFFA rəhbərliyinin qənaətinə görə, mükafat sistemi əvvəlcədən planlaşdırıldığı üçün Lixtenşteynlə oyuna görə də veriləcək. Üstəlik, rəhbərlik bildirib ki, bu, həm də Litva ilə oyun üçün futbolçularda motivasiya yarada bilər.
Qeyd edək ki, AFFA dülgər və çilingərlərə qalib gələ bilməyən milli komandaların saxlanmasına il ərzində 30 milyon manat büdcə ayırıb.