Çiyin zədələri təkcə peşəkar idmançıların problemi deyil, uzun müddət kompüter arxasında çalışan insanlarda da geniş yayılıb.
Ucnoqta.az xəbər verir ki, travmatoloq dos. Dr. Eralp Kaçmazın sözlərinə görə, xüsusilə yay aylarında fiziki aktivliyin artması ilə çiyin ağrıları və zədələri də çoxalır.
Mütəxəssis qeyd edib ki, üzgüçülük, tennis, voleybol və fitnes kimi fəaliyyətlər zamanı eyni hərəkətlərin təkrar olunması, kifayət qədər isinməmək, yanlış məşq texnikası və əzələ disbalansı çiyin nahiyəsində zədələnmə riskini artırır. Bundan əlavə, uzun müddət əyilmiş vəziyyətdə oturmaq və kompüter qarşısında işləmək də çiyin əzələlərinin balansını pozaraq problemlərə səbəb ola bilər.
Dos. Dr. Kaçmaz vurğulayıb ki, gecələr güclənən, qolu qaldırarkən hiss edilən və ya həftələrlə keçməyən çiyin ağrıları laqeyd yanaşılmamalıdır. Erkən diaqnostika və sadə müalicə üsulları gələcəkdə cərrahi müdaxilə tələb edə biləcək problemlərin qarşısını ala bilər.
O, zədələrin profilaktikası üçün idmandan əvvəl mütləq isinmə hərəkətləri etməyi, xüsusilə elastik bantlarla yüngül dartınma və gücləndirmə məşqlərini tövsiyə edib. Mütəxəssisin sözlərinə görə, düzgün hazırlıq, doğru texnika və şüurlu məşq həm aktiv həyat tərzini qorumağa, həm də çiyin sağlamlığını uzun müddət saxlamağa kömək edir.