Balıq insan orqanizmi üçün ən faydalı qidalardan biri hesab olunur. Tərkibində yüksək keyfiyyətli zülal, D, A və B12 vitaminləri, yod, selen, eləcə də ürək və beyin sağlamlığı üçün mühüm əhəmiyyət daşıyan omeqa-3 yağ turşuları var.
Ucnoqta.az xəbər verir ki, həkimlər sağlam qidalanmanın bir hissəsi kimi həftədə ən azı iki dəfə balıq istehlak etməyi tövsiyə edir. Mütəxəssislər xüsusilə aşağıdakı altı balığın sağlamlıq üçün daha faydalı olduğunu bildirirlər.
Qızılbalıq – Omeqa-3 yağ turşuları və D vitamini ilə zəngindir. Ürəyin fəaliyyətini dəstəkləyir, qan dövranını yaxşılaşdırır və ürək-damar xəstəlikləri riskini azalda bilər.
Skumbriya – Tərkibində omeqa-3, B12 vitamini, selen və bol zülal var. Müntəzəm istehlakı xolesterol səviyyəsinin tənzimlənməsinə, beyin fəaliyyətinin yaxşılaşmasına və iltihabın azalmasına kömək edir.
Siyənək – Damarların elastikliyini qorumağa, ürək ritmini dəstəkləməyə və sinir sisteminin normal fəaliyyətinə müsbət təsir göstərir. Mütəxəssislər az duzlu siyənəyə üstünlük verməyi məsləhət görürlər.
Sardina – Kiçik ölçüsünə baxmayaraq, kalsium, fosfor, D vitamini və omeqa-3 ilə zəngindir. Xüsusilə sümük, ürək və beyin sağlamlığının qorunması üçün faydalı hesab olunur.
Alabalıq – Yüksək keyfiyyətli zülal, faydalı yağlar, kalium və antioksidantlarla zəngindir. Asan həzm olunduğu üçün pəhriz saxlayanlar üçün də uyğun seçimdir.
Tun balığı – Zülal, B qrup vitaminləri, selen və omeqa-3 mənbəyidir. Bununla belə, həkimlər böyük ölçülü tun balığının civə toplama ehtimalının yüksək olduğunu nəzərə alaraq, xüsusilə hamilə qadınlara və uşaqlara onu həddindən artıq istehlak etməməyi tövsiyə edirlər.
Mütəxəssislərin sözlərinə görə, omeqa-3 yağ turşuları qan təzyiqinin normada saxlanmasına, yaddaş və diqqətin yaxşılaşmasına, damar elastikliyinin qorunmasına, “pis” xolesterolun azalmasına və qan laxtalanması riskinin aşağı düşməsinə kömək edir.
Bu səbəbdən həkimlər hər yaşda olan insanların, xüsusilə də 50 yaşdan yuxarı şəxslərin qidalanma rasionuna müntəzəm olaraq balıq daxil etməsini tövsiyə edirlər.