Dünyada insanların təxminən 90 faizi sağ, 10 faizi isə sol əllidir. Alimlər bu fərqin təsadüfi olmadığını və əsasən bioloji amillərlə bağlı olduğunu bildirirlər.
Ucnoqta.az xəbər verir ki, araşdırmalara görə, əlliliyin formalaşması hələ ana bətnində başlayır. Dölün inkişafının erkən mərhələsində sağ və ya sol əldən istifadə üstünlüyü yaranır və bu, çox vaxt doğuşdan sonra da davam edir. Mütəxəssislər bunu beynin yarımkürələrinin fərqli funksiyaları və sinir sisteminin inkişafı ilə əlaqələndirirlər.
Genetik tədqiqatlar göstərir ki, sağ və ya sol əlli olmağa tək bir gen deyil, çoxsaylı genlər, həmçinin ətraf mühit amilləri təsir edir.
Alimlərin fikrincə, sağ əlliliyin geniş yayılması insanın təkamülü ilə də bağlıdır. İki ayaq üzərində yeriməyə keçid əllərin alət hazırlamaq, daşımaq və incə hərəkətlər üçün daha çox istifadə edilməsinə şərait yaradıb. Arxeoloji tapıntılar insanların ən azı 500 min il əvvəl də əsasən sağ əlli olduqlarını göstərir.
Mütəxəssislər vurğulayırlar ki, sol əllilik heç bir inkişaf pozğunluğu deyil. Buna görə də uşaqları məcburi şəkildə sağ əllə yazmağa və işləməyə öyrətmək tövsiyə edilmir, çünki bu, əlavə stress yarada və motor bacarıqlarının inkişafına mənfi təsir göstərə bilər.