Axşam saatlarında şokolad, peçenye və digər şirniyyatlara meylin artması hər zaman iradə zəifliyi ilə bağlı deyil. Bunun səbəbi gün ərzində kifayət qədər qidalanmamaq və orqanizmin ehtiyac duyduğu maddələri almaması ola bilər.
Ucnoqta.az xəbər verir ki, dietoloq Tanya Fantine bu barədə G4Food portalına danışıb.
Mütəxəssisin sözlərinə görə, axşam yeməyindən sonra yenidən aclıq hiss etmək normaldır. Xüsusilə şam yeməyi ilə yuxu arasında 4-5 saat vaxt keçirsə və gün ərzində az qidalanılıbsa, şirniyyata meyl arta bilər.
Dietoloq arıqlamaq istəyənlərin tez-tez yol verdiyi səhvlərdən birinin qidanı həddindən artıq azaltmaq olduğunu vurğulayır. Məsələn, yalnız tərəvəz və az miqdarda pendirdən ibarət yüngül şam yeməyi orqanizmin ehtiyaclarını ödəməyə bilər.
Doyumlu axşam yeməyində zülal, tərəvəz, müəyyən miqdarda karbohidrat və faydalı yağlar olmalıdır. Zülallı qidalar toxluq hissini uzadır, tərəvəzlər lif və həcm təmin edir. Kartof, düyü və çörəyi isə yalnız axşam olduğu üçün menyudan çıxarmaq lazım deyil.
Arıqlamaq istəyənlər üçün dietoloq təxminən 40 qram zülal ehtiva edən, 350-400 kilokalorilik şam yeməyini nümunə göstərir. Lakin bu, hamı üçün uyğun norma deyil. Qida ehtiyacı insanın çəkisindən, fiziki aktivliyindən, sağlamlıq vəziyyətindən və ümumi qidalanmasından asılıdır.