Oktyabr ayında Avropada səyahət etmək üçün kifayət qədər isti və günəşli məkanlar qalır. Bu dövr yay istisindən və turist sıxlığından uzaq, rahat istirahət etmək istəyənlər üçün əlverişli sayılır.
Ucnoqta.az xəbər verir ki, The Independent oktyabr ayında havanın nisbətən isti qaldığı altı Avropa istiqamətini təqdim edib.
Sevilya, İspaniya
Andalusiyanın paytaxtında oktyabr ayında orta temperatur təxminən +21°C, gündüz saatlarında isə hava +27°C-yə qədər yüksələ bilər. Şəhərdə gündə orta hesabla yeddi saat günəşli hava müşahidə olunur.
Bu dövrdə Kral Alkazarı, Sevilya Kafedralı, Qızıl qüllə və Kasa-de-Pilatos sarayını ziyarət etmək, həmçinin Quadalqivir çayı boyunca və Mariya Luiza parkında gəzmək olar.
Valletta, Malta
Malta oktyabr ayında da isti hava ilə seçilir. Orta temperatur +24°C civarında olur və gün ərzində təxminən yeddi saat günəşli hava müşahidə edilir.
Vallettada dəniz istirahətini tarixi məkanlarla birləşdirmək mümkündür. Müqəddəs İoann Kafedralı, Müqəddəs Elmo qalası, Böyük Magistr sarayı və Barrakka bağları turistlərin maraq göstərdiyi əsas yerlərdəndir.
Sardiniya, İtaliya
İtaliyanın Sardiniya adasında oktyabr ayında orta temperatur təxminən +18°C olur. Gün ərzində təxminən altı saat günəşli hava müşahidə edilir. Dənizin kifayət qədər isti qalması çimərlik və su əyləncələrinə imkan verir.
Ada çimərlikləri ilə yanaşı, qədim şəhərləri, orta əsr memarlığı və təbiət parkları ilə də diqqət çəkir.
Kipr
İsti hava axtaranlar üçün Kipr də oktyabr ayında əlverişli istiqamətlərdəndir. Bu ayda orta temperatur +23°C, günəşli saatların sayı isə təxminən səkkiz saatdır.
Adada dəniz istirahəti ilə yanaşı, tarixi məkanları da ziyarət etmək mümkündür. Kurion qədim şəhəri, Çarlar məqbərələri və Kolossi qalası turistlərin diqqət çəkən məkanlarındandır.
Alqarve, Portuqaliya
Portuqaliyanın cənubundakı Alqarve bölgəsində oktyabr ayında orta temperatur +23°C təşkil edir. Gün ərzində təxminən yeddi saat günəşli hava olur.
Bölgə uzun qumlu çimərlikləri ilə məşhurdur. Payız aylarında burada gəzintilər və piyada marşrutları üçün də əlverişli şərait yaranır. Faro şəhəri isə bölgənin tarixini və mədəniyyətini yaxından tanımaq üçün maraqlı seçimdir.
Rodos, Yunanıstan
Yunanıstanın Rodos adasında oktyabr ayında orta temperatur +22°C civarındadır. Günəş təxminən səkkiz saat ərzində görünür.
Rodos həm çimərlik, həm də mədəni istirahət üçün imkan yaradır. Adanın qədim şəhərində qorunub saxlanılan qala divarları və tarixi küçələr, Lindos və Faliraki ərazilərində isə dəniz və çimərliklər turistlərin marağına səbəb olur.