Məqsəd bağırsaqların fəaliyyətini dəstəkləməkdirsə, meyvələri şirə şəklində deyil, bütöv halda yemək daha məqsədəuyğundur.
Ucnoqta.az xəbər verir ki, şirə hazırlanarkən lifin əhəmiyyətli hissəsi itirilir. Buna görə də belə içkilər bağırsaq mikrobiomuna və həzm sisteminin fəaliyyətinə bütöv meyvə ilə eyni təsiri göstərmir.
Bu səbəbdən alma, portağal və ya armudu bütöv şəkildə yemək lif baxımından həmin meyvələrdən hazırlanmış bir stəkan şirədən daha faydalıdır.
Gündə nə qədər lif qəbul etmək lazımdır?
Verywell Health-in məlumatına görə, yetkin qadınların gündə təxminən 22–28 qram, kişilərin isə 28–34 qram lif qəbul etməsi tövsiyə olunur.
Tək bir meyvə bu ehtiyacı ödəyə bilməz. Buna görə rasionda müxtəlif lif mənbələrinə – meyvə, tərəvəz, paxlalılar, tam taxıllı məhsullar və çərəzlərə yer vermək daha məqsədəuyğundur.
Əgər əvvəllər lif az qəbul edilibsə, onun miqdarını birdən-birə artırmaq məsləhət görülmür. Bu, köp, qaz və qarında narahatlıq yarada bilər. Lif qəbulunu tədricən artırmaq və kifayət qədər maye içmək lazımdır ki, lif bağırsaqlarda normal fəaliyyət göstərə bilsin.