Böyük Britaniyanın Hull şəhərində yerləşən Ineos kimya qrupuna məxsus üç zavod yüksək qaz qiymətləri səbəbindən fəaliyyətini dayandıracaq.
Ucnoqta.az xəbər verir ki, BBC-nin məlumatına görə, bu barədə şirkətin sahibi, britaniyalı biznesmen Cim Retkliff bildirib. Onun sözlərinə görə, Avropada qazın qiyməti ABŞ-dakından 12 dəfə, Çindəkindən isə 8 dəfə yüksəkdir.
Zavodlarda Böyük Britaniya və Avropada dərman, geyim, kosmetika, yuyucu vasitələr, tikinti materialları və digər məhsulların istehsalında istifadə olunan xammal hazırlanır. Qaz isə istehsal prosesinin əsas komponentlərindən biridir.
Şirkətin məlumatına görə, müəssisələrin fəaliyyətinin dayandırılması ümumilikdə təxminən 1 000 işçiyə təsir edəcək. Onlardan 245-i birbaşa həmin zavodlarda çalışır. İşçilərin dayanma müddətində iş yerlərinin qorunacağı bildirilir.
Ineos bu müddətdə ABŞ-dan daha ucuz qiymətə mayeləşdirilmiş təbii qaz (LNG) tədarükü üçün birbaşa müqavilələr bağlamağa çalışacaq. Bu prosesin bir ilə qədər davam edə biləcəyi qeyd olunur. Şirkət həmçinin qaz qiymətlərinin aşağı düşəcəyinə ümid edir.