Bir çox insan meyvə və tərəvəzləri avtomatik olaraq soyur.
Ucnoqta.az xəbər verir ki, halbuki bəzi məhsulların qabığında lif, vitaminlər və antioksidantlar da daxil olmaqla faydalı maddələr daha çox ola bilər. Lakin bu, bütün meyvə və tərəvəzlərin qabığının yeyilməsinin təhlükəsiz olduğu anlamına gəlmir.
Qabığını soymadan yemək mümkün olanlar
Alma və armudu qabığı ilə yemək olar. Onların qabığı lif və kversetin kimi antioksidantlarla zəngindir. Şaftalı, nektarin və gavalının qabığı da yeməlidir.
Kartof və şirin kartofu da qabığını soymadan hazırlamaq mümkündür. Bunun üçün onları əvvəlcə axar su altında yaxşı yumaq və fırça ilə təmizləmək lazımdır. Lakin güclü yaşıllaşmış və ya çox cücərmiş kartofdan istifadə etmək məsləhət görülmür.
Qida təhlükəsizliyi üzrə professor İnda Upadhyaya bildirir ki, belə kartoflarda qlikoalkaloidlər məhz qabıqda, cücərtilərdə və yaşıl hissələrdə toplana bilər.
Kökü də yaxşı yumaq kifayətdir. Xiyar qabığı ilə yeyildikdə əlavə lif və K vitamini verir. Badımcanın qabığı da yeyilə bilər və onun tərkibində antioksidant nasunin var. Gənc kabaçki və zukkininin isə ümumiyyətlə soyulmasına ehtiyac yoxdur.
Kivinin qabığı da yeyilə bilər. O, meyvəyə əlavə lif və C vitamini verir. Bununla belə, kiviyə allergiyası olan insanlarda qabıq qaşınma və ağızda göynəmə yarada bilər.
Hansı məhsulları soymaq daha yaxşıdır?
Avokadonun qabığı sərt, acı və çətin həzm olunur. Bananın qabığı texniki olaraq bişirildikdən sonra yeyilə bilər, lakin çiy halda lifli və acıdır. Ananasın qabığı isə sərt və lifli olduğundan yeyilməsi tövsiyə edilmir.
Manqonun qabığı da texniki olaraq yeyilə bilər, lakin acı və liflidir. Bundan əlavə, tərkibində həssas insanlarda allergik reaksiyaya səbəb ola bilən uruşiol maddəsi var.
Sitrus meyvələrinin – portağal, limon və laymın – qabığı adətən bütöv şəkildə yeyilmir. Lakin onların rəndələnmiş üst qatı, yəni sedrası, şirniyyat və içkilərdə istifadə oluna bilər.
Meyvə-tərəvəzi necə düzgün yumaq lazımdır?
Qabığını yeməyi planlaşdırırsınızsa, məhsulları axar su altında yaxşıca yumaq lazımdır. Sərt səthli tərəvəzləri təmiz fırça ilə də yumaq olar. Mütəxəssislər meyvə və tərəvəzləri sabun və ya digər yuyucu vasitələrlə yumağı məsləhət görmürlər.
Dietoloq Diana Gevaranın sözlərinə görə, məhsulların axar su altında yuyulması onların səthindəki pestisid qalıqlarının bir hissəsinin uzaqlaşdırılmasına kömək edir.
Meyvə və tərəvəzi hətta qabığını soyacağınız halda da yumaq vacibdir. Çünki doğrama zamanı səthdəki bakteriyalar bıçaq vasitəsilə məhsulun iç hissəsinə keçə bilər.