Botoksdan sonra baş verən bəzi sağlamlıq problemləri estetik prosedurların təhlükəsizliyi ilə bağlı sualları yenidən gündəmə gətirib.
Ucnoqta.az xəbər verir ki, dermatoloq Yusuf Kellecinin sözlərinə görə, bu hallar botoksun təhlükəli olması demək deyil. Əsas məsələ prosedurun kim tərəfindən, hansı şəraitdə və hansı preparatla aparılmasıdır.
Mütəxəssis bildirib ki, botoks dünyada milyonlarla insana tətbiq olunan, effektivliyi və təhlükəsizliyi elmi araşdırmalarla təsdiqlənmiş tibbi prosedurdur. Onun sözlərinə görə, mənfi nəticələr əksər hallarda standartlara uyğun olmayan tətbiqlər, mənşəyi bilinməyən preparatlar və ya ixtisassız şəxslər tərəfindən aparılan prosedurlarla bağlı olur.
Həkim vurğulayıb ki, botoks yalnız estetik məqsədlərlə istifadə edilmir. O, xroniki miqren, həddindən artıq tərləmə, diş qıcama və çənə əzələlərinin həddindən artıq aktivliyi kimi problemlərin müalicəsində də geniş tətbiq olunur.
Yusuf Kelleci botoksun botulizmlə qarışdırılmasının yanlış olduğunu da qeyd edib. Onun sözlərinə görə, botulizm bakteriyanın ifraz etdiyi toksin nəticəsində yaranan ağır zəhərlənmədir, tibbi botoksda isə həmin maddə yüksək təmizlik dərəcəsində, standartlaşdırılmış və çox kiçik dozalarda istifadə olunur.
Mütəxəssis botoksun yalnız anatomiya biliklərinə malik, təcrübəli həkimlər tərəfindən aparılmalı olduğunu bildirib. O, istifadə olunan preparatın orijinal, lisenziyalı və düzgün saxlanıldığının yoxlanmasının vacibliyini də xatırladıb.
Həkimin sözlərinə görə, botoks hər kəs üçün uyğun deyil. Hamiləlik və südvermə dövründə, bəzi sinir-əzələ xəstəlikləri zamanı, həmçinin aktiv infeksiya olduqda bu prosedur tövsiyə edilmir. Bundan başqa, pasiyentin istifadə etdiyi dərmanlar və ümumi sağlamlıq vəziyyəti əvvəlcədən qiymətləndirilməlidir.
Botoksdan sonra ilk dörd saat ərzində uzanmamaq, inyeksiya nahiyəsinə təzyiq göstərməmək və masaj etməmək məsləhət görülür. Həmin gün ağır fiziki fəaliyyət, sauna, hamam və çox isti mühitdən də uzaq durmaq tövsiyə edilir.
Botoks etdirməzdən əvvəl mütləq veriləcək 10 sual:
Proseduru həyata keçirən şəxs bu sahə üzrə ixtisaslı həkimdirmi?
İstifadə olunacaq preparat orijinal və lisenziyalıdırmı?
Botoks mənim sağlamlıq vəziyyətimə uyğundurmu?
Qəbul etdiyim dərmanlar prosedura təsir göstərə bilərmi?
Mənə tətbiq olunacaq doza necə müəyyən ediləcək?
Təsir nə vaxt başlayacaq və nə qədər davam edəcək?
Mümkün yan təsirlər hansılardır?
Prosedurdan sonra nələrə diqqət etməliyəm?
Gözlənilməz vəziyyət yaranarsa, necə davranmalıyam?
Nəzarət müayinəsi nə vaxt keçiriləcək?