Astrologiya və numerologiyaya görə, insanın doğulduğu ay onun xarakter xüsusiyyətləri ilə yanaşı, liderlik potensialına da müəyyən təsir göstərə bilər. Mütəxəssislər hesab edirlər ki, ilin istənilən ayında doğulan insanlar uğurlu lider ola bilsələr də, mart, iyun, sentyabr və noyabr aylarında dünyaya gələnlər bu baxımdan daha çox seçilirlər.
Ucnoqta.az xəbər verir ki, bu barədə Parade jurnalı yazıb.
Nəşrin məlumatına görə, əsl lider hər zaman ən çox danışan və ya diqqət mərkəzində olan şəxs olmur. Əksinə, sakitliyini qoruyan, düşünülmüş qərarlar verən, insanları ruhlandıra və komandaya dəstək ola bilən şəxslər daha çox etibar qazanırlar.
Mart
Mart ayında doğulanlar sakit xarakterləri, özünəinamları və çətin vəziyyətlərdə düzgün qərar vermək bacarıqları ilə seçilirlər. Onlar problemləri böyütmək əvəzinə həll yolları axtarmağa üstünlük verirlər.
Balıqlar və Qoç bürclərinin təsiri altında doğulan şəxslərin güclü intuisiyaya malik olduqları, insanları ortaq məqsəd ətrafında birləşdirmək bacarığı nümayiş etdirdikləri bildirilir.
İyun
İyun ayında doğulanların əsas üstünlüyü insanları bir araya gətirmək bacarığı hesab olunur. Əkizlər və Xərçəng bürclərinin təsiri ilə onlar ünsiyyətcil, mehriban və başqalarının fikirlərinə hörmətlə yanaşan insanlar kimi tanınırlar.
Onlar liderliyi şəxsi nüfuz üçün deyil, komandanın uğuru naminə qəbul edir, fərqli fikirləri dinləyir və ən yaxşı ideyanı dəstəkləməkdən çəkinmirlər.
Sentyabr
Sentyabr ayında doğulanlar soyuqqanlılıq və məsuliyyət hissi ilə fərqlənirlər. Onlar qərar verməzdən əvvəl vəziyyəti hərtərəfli təhlil edir və bütün faktları nəzərdən keçirirlər.
Qız və Tərəzi bürclərinin nümayəndələri etibarlı olmaları, verdikləri sözə əməl etmələri və məsuliyyətli davranışları ilə ətrafdakıların etimadını qazanırlar.
Noyabr
Noyabr ayında doğulanlar qətiyyətli və dözümlü xarakterə malik hesab olunurlar. Əqrəb və Oxatan bürclərinin nümayəndələri qarşılarına qoyduqları məqsədlərə çatmaq üçün çətinliklərdən çəkinmir, uğursuzluqlara baxmayaraq yollarına davam edirlər.
Onların iradəsi, özünəinamı və məqsədyönlülüyü ətrafındakı insanlara da motivasiya verir və liderlik keyfiyyətlərini ön plana çıxarır.
Qeyd edək ki, bu məlumatlar astrologiyanın şərhlərinə əsaslanır və elmi baxımdan təsdiqlənmiş faktlar hesab olunmur. Liderlik bacarıqları insanın fərdi xüsusiyyətləri, təcrübəsi və yaşadığı mühitdən də əhəmiyyətli dərəcədə asılıdır.