Fevralın 4-də Vəkillər Kollegiyasının Rəyasət Heyətinin iclası keçirilib.
Ucnoqta.az xəbər verir ki, iclası giriş sözü ilə açan Kollegiyanın sədri Anar Bağırov bu ilin fevral ayının 1-dən etibarən order markalarının tətbiqi barədə məlumat verib, gələcək dönəmdə vəkillərin sayının artımı ilə bağlı qəbul işinin səmərəli təşkilinin əhəmiyyəti barədə fikirlərini bölüşüb.
İclasda Tərtər və Astara rayon vəkil bürolarının təsis olunması barədə məsələyə baxılaraq müsbət qərar qəbul olunmuş, başqa vəkil qurumuna keçmək və sair müraciətlərə baxılıb.
İclasda vəkillər barəsində başlanılmış 8 intizam icraatı üzrə Vəkillərin İntizam Komissiyasının rəylərinə baxılaraq, qanunvericiliyin tələblərini pozduğuna görə 1 vəkilə irad, 1 vəkilə xəbərdarlıq verilib, 3 iş üzrə isə pozuntu aşkar edilmədiyi, eləcə də daxil olmuş şikayətlərdəki məlumatlara hüquqi qiymət verilməsi mümkün olmadığı üçün intizam icraatlarına xitam verilmiş, 3 intizam işi üzrə isə əlavə araşdırma aparılması ilə əlaqədar məsələ növbəti iclasda baxılanadək təxirə salınıb.
Sonda Vəkillər Kollegiyasının fəaliyyəti üçün əhəmiyyət kəsb edən sair məsələlərə baxılıb.