Səudiyyə Ərəbistanı futbol çempionatının klubu braziliyalı hücumçu Vinisiusun transferi üçün İspaniyanın “Real Madrid” klubuna 1 milyard avro dəyərində təklif göndərib.
Ucnoqta.az xəbər verir ki, bu barədə “Athletic” portalı məlumat yayıb. Məlumata görə, futbolçu Madrid komandasında xoşbəxt olduğu və İspaniya klubunun tərkibində “Qızıl top”u qazanmaq istədiyi üçün transfer təklifindən imtina edib. O da qeyd olunur ki, "Real" futbolçu ilə ayrılmaq niyyətində deyil, onun müqaviləsindəki təzminat məbləği 1 milyard avrodur.
Portal iddia edir ki, Vinisiusun 2034-cü ildə keçiriləcək dünya çempionatı öncəsi ölkə çempionatının siması olması üçün ölkənin idman nazirliyi adından Dövlət İnvestisiya Fondunun nümayəndə heyəti tərəfindən danışıqlar aparılır. Bildirilir ki, Səudiyyə Ərəbistanı komandasının rəhbərliyi ilk cəhddəki uğursuzluğa baxmayaraq, gələcəkdə danışıqlara qayıdacaq. “Globo” portalının məlumatına görə, “Əl-Əhli” klubu futbolçunun transferində maraqlıdır.
Vinisiusun 24 yaşı var. O, 2018-ci ilin yayından “Real Madrid”də çıxış edir və bu müddət ərzində futbolçu 264 oyun keçirib, 83 qol vurub və 75 məhsuldar ötürmə verib. Komanda ilə birlikdə Vinisius üç dəfə çempionluq və İspaniya Superkubokunu, iki dəfə Çempionlar Liqasını və Klublararası Dünya Çempionatını, bir dəfə İspaniya Kubokunu və UEFA Super Kubokunu qazanıb.