ABŞ Prezidenti Donald Tramp dünya liderlərinə zəng edərək onlardan İranla istənilən əlaqəni dayandırmağı tələb edir.
Ucnoqta.az xəbər verir ki, bu barədə ABŞ-ın maliyyə naziri Skott Bessent keçirdiyi mətbuat konfransında bildirib.
Onun sözlərinə görə, Tramp dünya liderlərinə İranla əlaqələri dayandırmaqla bağlı konkret tələblər çatdırır. Bessent Trampın hansı ölkələrin liderləri ilə danışdığını açıqlamayıb.
“Biz konkret adları açıqlamayacağıq. Artıq müəyyən nəticələr görürük və əminəm ki, prezident çox inandırıcıdır”, – Bessent deyib.
Nazir əlavə edib ki, ABŞ Dövlət Departamenti və Maliyyə Nazirliyi də müxtəlif səfərlər və telefon danışıqları vasitəsilə ölkələrə və təşkilatlara Vaşinqtonun onlardan nə gözlədiyini və bunun hansı müddətdə həyata keçirilməli olduğunu açıq şəkildə bildirir.
Bessentin sözlərinə görə, bu tələblərə əməl edilmədiyi təqdirdə “çox tezliklə onların hərəkətlərinin nəticələri” görünə bilər.