İqtisadçı-alim, hüquqşünas, iqtisad üzrə fəlsəfə doktoru, dövlət qulluğunun kiçik müşaviri, tanınmış maliyyə, vergi və audit eksperti Nazim Şükürov Azərbaycan Qiymətləndiricilər Cəmiyyətinin (AQC) İdarə Heyətinin sədri Vüqar Orucun müşaviri təyin olunub.
Nazim Şükürov dövlət idarəçiliyi, maliyyə, vergi siyasəti, audit, hüquq, investisiya və strateji idarəetmə sahələrində 40 ildən artıq peşəkar fəaliyyətə malik mütəxəssislərdəndir.
O, müxtəlif dövrlərdə Azərbaycan Respublikası Vergilər Nazirliyində Vergidənyayınmaya Nəzarət İdarəsinin rəisi, İqtisadi Təhlil Baş İdarəsinin rəis müavini, auditor və iqtisadi məsələlər üzrə ekspert vəzifələrində çalışıb. Nazirlikdə fəaliyyəti dövründə respublika üzrə vergi nəzarətinin təşkili, iqtisadi təhlillərin aparılması, vergi inzibatçılığının təkmilləşdirilməsi, sahibkarlıq subyektləri ilə işin koordinasiyası və ərazi vergi orqanlarının fəaliyyətinin metodiki idarə olunmasına rəhbərlik edib.
Daha sonra Azərbaycan Milli Elmlər Akademiyasının Yüksək Texnologiyalar Parkının direktoru vəzifəsində çalışaraq xüsusi iqtisadi zonada yüksək texnologiyalar istehsalının təşkili, innovasiya layihələrinin hazırlanması və investisiyaların cəlb edilməsi istiqamətində mühüm layihələrə rəhbərlik edib.
2022–2024-cü illərdə Cəlilabad Rayon İcra Hakimiyyəti başçısının müavini, eyni zamanda Sosial-iqtisadi inkişafın təhlili və proqnozlaşdırılması şöbəsinin müdiri vəzifəsində fəaliyyət göstərib. Onun kurasiyasına rayonun sosial-iqtisadi inkişafı, infrastruktur layihələri, tikinti, kommunal təsərrüfat, kənd təsərrüfatı, məşğulluq və digər strateji istiqamətlər daxil olub.
Hazırda “Audit Azərbaycan” hüquq və konsaltinq şirkətinin baş direktorudur. Rəhbərlik etdiyi şirkət hüquq, vergi, audit, maliyyə, gömrük, investisiya, məhkəmə ekspertizası, iqtisadi mübahisələr, əmlak münasibətləri, qida təhlükəsizliyi və böhran idarəçiliyi sahələrində kompleks konsaltinq xidmətləri göstərir.
Nazim Şükürov Azərbaycan Dövlət İqtisad Universitetinin məzunudur. Azərbaycan Universitetində hüquq təhsili alıb, 2016-cı ildə “İnvestisiyaların innovasiya yönümünün təmin olunmasının makroiqtisadi problemləri” mövzusunda dissertasiya müdafiə edərək iqtisad üzrə fəlsəfə doktoru elmi dərəcəsinə layiq görülüb.
O, investisiya və innovasiya iqtisadiyyatı mövzusunda 13 elmi əsərin müəllifidir. Elmi işlərindən üçü xarici ölkələrdə dərc olunub. Rusiyanın nüfuzlu “Креативная экономика” jurnalında çap edilən “Стимул к совершенствованию” məqaləsi beynəlxalq elmi fəaliyyətinin mühüm nümunələrindən biridir.
Peşəkar fəaliyyəti çərçivəsində Almaniyada strateji nəqliyyat menecmenti, Türkiyədə vergi auditi, Macarıstanda elektron audit üzrə beynəlxalq ixtisasartırma proqramlarını uğurla başa vurub.
2024–2025-ci illərdə Dünya Bankı Qrupunun Business Ready (B-READY 2025) proqramında ekspert kimi iştirak edib. Azərbaycanda biznes və investisiya mühitinin qiymətləndirilməsi üzrə beynəlxalq tədqiqatlara verdiyi peşəkar töhfəyə görə Dünya Bankı Qrupu tərəfindən sertifikatla təltif olunub.
Nazim Şükürov dövlət idarəçiliyi, strateji planlaşdırma, layihələrin idarə olunması, audit, iqtisadi və maliyyə təhlili, investisiya siyasəti, büdcə planlaşdırılması, dövlət satınalmaları, risklərin idarə olunması və institusional inkişaf sahələrində zəngin təcrübəyə malikdir.
Qeyd edək ki, Nazim Şükürovun AQC İdarə Heyəti sədrinin müşaviri vəzifəsinə təyin olunması təşkilatın elmi-metodoloji potensialının gücləndirilməsi, dövlət qurumları və beynəlxalq təşkilatlarla əməkdaşlığın genişləndirilməsi, eləcə də qiymətləndirmə sahəsində həyata keçirilən islahatlara ekspert dəstəyinin artırılması məqsədi daşıyır.
Həmçinin Nazim Şükürovun dövlət idarəçiliyi, maliyyə və vergi siyasəti, hüquq, audit və investisiya sahələrində qazandığı zəngin idarəçilik təcrübəsi cəmiyyətin strateji inkişafına və qarşıya qoyduğu hədəflərin həyata keçirilməsinə mühüm töhfə verəcək.