Təyyarələrdə paraşütün olmamasının əsas səbəbi onun əksər qəzalarda faydasız olmasıdır.
Ucnoqta.az xəbər verir ki, aviasiya statistikasına görə, ölümcül qəzaların böyük hissəsi qalxma və eniş zamanı baş verir. Bu zaman hündürlük paraşütün açılması üçün kifayət etmir.
Bundan əlavə, kruiz hündürlüyündə təyyarənin qapısını açmaq demək olar ki, mümkün deyil. Kabindəki yüksək təzyiq, 800–900 km/saat sürətlə hərəkət edən güclü hava axını və aşağı temperatur sərnişinin təhlükəsiz tullanmasını mümkünsüz edir.
Həmçinin, 10–12 kilometr yüksəklikdə qəfil təzyiq itkisi zamanı insanın şüurlu hərəkət etmək üçün cəmi 15–30 saniyəsi qalır. Bu müddətdə paraşütü geyinmək, çıxışa çatmaq və təhlükəsiz tullanmaq real deyil.
Məhz buna görə müasir sərnişin təyyarələri paraşütlə təxliyə üçün deyil, qəzanın qarşısını alan təhlükəsizlik sistemləri və fövqəladə eniş imkanları nəzərə alınaraq layihələndirilir.