Tbilisidə xarici agentlərlə bağlı qanun layihəsinə etiraz edənlər parlament binası yaxınlığında polislə toqquşmağa başlayıb.
Ucnoqta.az xəbər verir ki, bu barədə TASS-ın müxbiri hadisə yerindən məlumat verib.
Rustaveli prospektində parlamentin əsas girişinə toplaşan etirazçılar hakim Gürcü Arzusu – Demokratik Gürcüstan partiyası tərəfdarlarının mitinqinə təyin olunmuş qanunverici orqanın qarşısındakı səhnəyə çıxmağa çalışıblar. Polis onlara bunu etməyə icazə verməyib, bundan sonra dava düşüb.
Daxili İşlər Nazirliyi nümayişçilərə qarşı bibər qazından istifadə etməli olub. Artıq parlamentin qarşısına xüsusi təyinatlılar çıxıb, aksiyanı dağıtmaq üçün su şırnaqları və xüsusi texnika da gəlib. Gürcüstan Daxili İşlər Nazirliyi müraciət yayaraq etirazçıları sakit olmağa və qanundan kənara çıxmamağa çağırıb.
Aksiya iştirakçıları bazar günü Tbilisidə Birinci Respublika Meydanına toplaşıblar və orada bir neçə saat ərzində tədbirin təşkilatçıları xarici agentlər haqqında qanun layihəsinin geri götürülməsinə çağırışlarla çıxış ediblər. Daha sonra onlar parlamentə yürüş təşkil ediblər. Bu, xarici agentlərlə bağlı qanun layihəsinə qarşı əsas etirazlardan biridir.