Bakı Ağır Cinayətlər Məhkəməsində hakim Elnur Nuriyevin sədrliyi ilə Cinayət Məcəlləsinin 234.1-1-ci maddəsi ilə təqsirləndirilən Əzizov Tural Həsən oğlunun məhkəmə prosesi keçirilib.
"Unikal"ın əldə etdiyi məlumata görə, prosesdə çıxışlar mərhələsi başlayıb və dövlət ittihamçısı Tural Əzizovun 5 il müddətinə azadlıqdan məhrum edilməsini istəyib. Sonra təqsirləndirilənin vəkili Əsəd Əhmədli müdafiə nitqi ilə çıxış edib:
"Tural Əzizovun himayəsində 2 azyaşlı uşağının olmasını, 3-cü qrup əlil olmasını nəzərə almağınızı məhkəmədən xahiş edirəm. Həmçinin heç bir şahid ifadəsi öz sübutunu tapmamışdı. Tural saxlanılan zaman polis bölməsində video çəkiliş olmamışdı. Deyirlər üzərində mobil telefon olub, ancaq Tural ümumiyyətlə telefon işlətmir. Narkomaniya xəstəliyindən əzab çəkmir. Nizami rayonu ərazisində Siyaqut restoranının həyətində saxlanılsa da Xətai rayonu Ramiz Quliyev küçəsində saxlanıldığını qeyd edilib. Məhkəmədən xahiş edirəm, sadalananları nəzərə alaraq muvəkkilimə bəraət verəsiniz".
Prosesdə təqsirləndirilən, hazırda ev dustaqlığında olan Tural Əzizvov da son söz deyərək hakimlərdən obyektiv hökm çıxarılmasını xahiş edib.
Hakim Elnur Nuriyev müşavirədən sonra Tural Əzizov barəsində bəraət hökmü çıxarıb.
Qeyd edək ki, Tural Əzizov otən il may ayının 17-də də Sabunçu Rayon Məhkəməsində Cinayət Məcəlləsinin 234.1-ci maddəsi ilə bəraət alıb.