Polşanın Silahlanma Agentliyi İsveçin Saab konsernindən təxminən 1,5 milyard dollara bir neçə min tank əleyhinə qumbaraatan alacaq.
Ucnoqta.az xəbər verir ki, bu barədə respublikanın milli müdafiə naziri Vladislav Kosiniyak-Kamış isveçli həmkarı Pol Consonla danışıqların yekunu üzrə jurnalistlərə bildirib.
"Biz indicə çox mühüm müqavilə imzaladıq. Satınalmadan sonra Polşa silahlı qüvvələri İsveç istehsalı olan tank əleyhinə qumbaraatanları alacaq, bunun üçün biz 6,5 milyard zloti ayıracağıq”, – Polşa müdafiə departamentinin rəhbəri TVP İnfo tərəfindən yayımlanan mətbuat konfransında bildirib.
Nazirin sözlərinə görə, söhbət Polşa silahlı qüvvələri üçün FCD 558 nişangahına malik bir neçə min “Carl-Gustaf M4” tank əleyhinə qumbaraatanların, eləcə də onlar üçün sursatların alınmasından gedir. Müqaviləyə Polşa hərbçiləri üçün təlim də daxildir.