Heç kim Dağlıq Qarabağda böhranın inkişafında maraqlı deyil, nə Ermənistan, nə də Azərbaycan. Bunu Rusiya prezidenti Vladimir Putin iyunun 30-da birbaşa xətt zamanı vətəndaşların suallarını cavablandırarkən bildirib.
"Rusiya bu çox ciddi böhranın nizamlanmasında müəyyən rol oynayıb. Onun inkişaf etməsində heç kim maraqlı deyil: nə Azərbaycan, nə Ermənistan, xüsusən də Dağlıq Qarabağın sakinləri.
Çünki işin digər tərəfi ondan ibarətdir ki, əgər biz hamımız sülh içində və mehriban yaşasaq, adamların təkcə təhlükəsizlik sahəsində həyatının yaxşılaşması üçün yox, həm də iqtisadi, sosial inkişafı üçün şərait yaradacağıq ki, Qarabağda adamların buna böyük ehtiyacı var", – o deyib.
Dağlıq Qarabağ ətrafında həm infrastrukturun bərpası, həm də Ermənistanla Azərbaycan arasında sərhəddin bölünməsilə bağlı çoxlu problemlər var. "Biz indi bu iş üzrə prosesdəyik… Regionda normal əlaqələri bərpa etmək üçün əlimizdən gələni edəcəyik", – prezident əlavə edib.//turan.az