Azərbaycan Respublikasının Ermənistan tərəfindən işğal olunmuş ərazilərinə qanunsuz səfər etmiş bir qrup Belçika parlament üzvü “La Libre” qəzeti vasitəsilə açıq məktubla ölkəmizin Belçikadakı səfirliyinə müraciət ediblər. XİN-nin mətbuat xidmətindən ucnoqta.az-a verilən məlumata görə. Azərbaycan Respublikasının Belçika Krallığındakı Səfiri Fuad İsgəndərov 12 aprel 2017-ci ildə “La Libre” qəzetində dərc edilmiş məqaləsi ilə işğal olunmuş ərazilərimizə qanunsuz səfər etmiş Belçikalı millət vəkillərinin açıq məktubunu cavablandırıb:
"Hörmətli parlamentarlar,
Sizin adlarınız həqiqətən də Azərbaycana girişi qadağan edilmiş şəxslərin siyahısındadır. Çünki, siz Azərbaycanın razılığı olmadan, hazırda Ermənistanın işğalı altında olan Dağlıq Qarabağ regionumuza qanunsuz səfər etmiş, beləliklə də ölkəmizin beynəlxalq səviyyədə tanınmış sərhədlərini pozmuşsunuz. Hər bir ölkə onun dövlət sərhədlərini pozan şəxslərə qarşı sanksiyalar tətbiq edir. Azərbaycan də bu baxımdan istisna təşkil etmir və onun qanunvericiliyi ilk mərhələdə ölkəyə girişin qadağan edilməsi, bu halların mütəmadi təkrar ediləcəyi halda isə cinayət işinin açılması, iki və çoxtərəfli beynəlxalq hüquqi əməkdaşlıqdan istifadə etməklə aparılmasını nəzərdə tutur.
Azərbaycan hökuməti bu günədək Dağlıq Qarabağa səfər etmək üçün öncədən ona müraciət etmiş çoxsaylı xarici vətəndaşlara belə icazələr vermişdir. Habelə, regiona qanunsuz səfərlər etmiş, lakin sonradan Azərbaycan hökumətinə belə əməllərə görə təəssüflərini ifadə etmiş 10-larla xarici vətəndaş müvafiq siyahıdan çıxarılmışdır. Bu sahədə Azərbaycanın yanaşması tamamilə konstruktiv səciyyə daşıyır.
Münaqişə beynəlxalq hüquq prizmasından
Nüfuzlu beynəlxalq təşkilatların Dağlıq Qarabağ münaqişəsinə dair mövqeyi tam aydındır. BMT Təhlükəsizlik Şurası işğalçı qüvvələrin işğal olunmuş Azərbaycan ərazilərindən dərhal və qeyd-şərtsiz çıxarılmasını tələb edən 822, 853, 874 və 884 saylı qətnamələri hələ 1993-cü ildə qəbul etmişdir. Avropa Parlamentinin 2013-ci və 2015-ci illərdə qəbul etdiyi Avropa Qonşuluq Siyasəti üzrə B7-0484/2013 və A8-0194/2015 saylı qətnamələr BMT TŞ-nin bu 4 qətnaməsinin icrasını tələb etmiş, Şərq Tərəfdaşlığının bir ölkəsi tərəfindən digər ölkəsinin ərazisinin işğalını birmənalı pisləmişdir. Avropa Şurası Parlament Assambleyası digər ölkənin ərazisinin işğalının bir ölkənin AŞ üzvü kimi öhdəliklərinin ciddi pozuntusu təşkil etdiyini vurğulayan 1416 (2005) saylı qətnamə qəbul etmişdir. Avropa İnsan Hüquqları Məhkəməsi tərəfindən 16 iyun 2015-ci il tarixində Çıraqov və digərləri Ermənistana qarşı işi üzrə qəbul edilmiş qərar da Ermənistanın Dağlıq Qarabağ üzərində nəzarət həyata keçirdiyini vurğulamışdır.
Problemin mənəvi tərəfi
Bu gün təkcə Dağlıq Qarabağ regionu deyil, onun ətrafında yerləşən daha 7 rayon Ermənistan işğalı altındadır və həmin ərazilərdə etnik təmizləmə aparılmışdır. Dağlıq Qarabağda yerləşən və yalnız etnik azərbaycanlıların yaşadığı Xocalı şəhəri Ermənistan tərəfindən işğal edilmiş və törədilmiş soyqırım nəticəsində onun 613 nəfər sakini amansızlıqla qətlə yetirilmişdir. Dağlıq Qarabağda yerləşən Şuşa şəhərindən qovulmuş əhali bu gün Azərbaycanın müxtəlif yerlərində müvəqqəti yaşamaq məcburiyyətindədir. Dağlıq Qarabağın ətrafında yerləşən 7 rayondan isə 700000-dən artıq azərbaycanlı qovulmuş və məcburi köçkünə çevrilmişdir. Dağlıq Qarabağda və ətraf rayonlarda Azərbaycan mədəni və tarixi irsinə qarşı vandallıq həyata keçirilməkdə və qanunsuz iqtisadi fəaliyyət aparılmaqdadır. Məhz buna görə də biz xarici ölkələrin nümayəndələrinin insanlıq əleyhinə bu cinayətlərin törədilməsində iştirak etmiş qondarma rejimin təmsilçiləri ilə təmaslarına qarşı çıxış edirik.
Beləliklə, sizin səfərləriniz münaqişənin həllinə töhfə verə bilməmiş, əksinə, Ermənistan tərəfindən qondarma rejimin və işğalın nəticələrinin beynəlxalq səviyyədə təbliği üçün istifadə edilmişdir.
Sizinlə görüşməyə hazıram
Təəssüf ki, sizin Xankəndində olduğunuz zaman keçirdiyiniz mətbuat konfransında, yaxud da məktubunuzda azərbaycanlı icmasının regiona geri dönməsinin və hər 2 icma arasında dialoqun zəruriliyi ilə bağlı heç bir fikrə rast gəlmədim.
Mən sizi gələcəkdə Azərbaycan Respublikası qanunvericiliyini və beynəlxalq hüququ pozan səfərlərdən çəkinməyə və bunun əvəzinə, Dağlıq Qarabağın icmaları arasında dialoqun təşkilində iştirakla sülh prosesinə töhfə verməyə dəvət edirəm. Dağlıq Qarabağın Azərbaycanlı icmasının nümayəndələri 2016-ci ilin oktyabr ayında Brüsselə etdikləri səfər çərçivəsində Belçika federal Parlamentində, Flamand Regionu və Brüssel-Paytaxt Regionu Parlamentlərində keçirdiyi görüşlərdə, eləcə də Belçika mətbuatına verdikləri müsahibələrdə belə dialoqa hazır olduqlarını vurğulamışlar.
Öz ölkəmin Belçika Krallığına ən xoş münasibətinin göstəricisi olaraq, bu məsələləri təfsilatı ilə müzakirə etmək üçün sizinlə görüşməyə hazıram.