ABŞ və İran arasında pərdəarxası aparılan danışıqların gündəliyi genişlənərək Qırmızı dəniz və Bab əl-Məndəb boğazında gəmiçiliyin təhlükəsizliyi məsələsini də əhatə edib.
Ucnoqta.az xəbər verir ki, bu barədə BƏƏ-nin The National qəzeti Pakistanlı mənbəyə istinadən məlumat yayıb.
Mənbənin sözlərinə görə, tərəflər arasında aparılan gizli təmasların ayrıca mərhələsi yalnız Hörmüz boğazı və Qırmızı dənizdəki vəziyyətə həsr olunub.
Bildirilir ki, Vaşinqton hər iki strateji su hövzəsində ticarət gəmilərinə qarşı hücumların dayandırılmasını təmin edəcək mexanizm üzərində işləyir. Bunun müqabilində Tehran iyun ayında əldə olunmuş memorandumda nəzərdə tutulan öhdəliklərin yerinə yetirilməsini, o cümlədən neft ixracına qoyulan məhdudiyyətlərin yumşaldılmasını və sanksiyaların mərhələli şəkildə aradan qaldırılmasını istəyir.
Nəşr xatırladır ki, Yəməndə fəaliyyət göstərən Ənsar Allah (husi) hərəkatının Səudiyyə Ərəbistanına qarşı blokada elan etməsindən sonra Bab əl-Məndəb boğazından keçən gəmiçilik həcmi 56 faiz azalıb. Bu marşrut dünya ticarəti üçün ən mühüm dəniz yollarından biri hesab olunur.
“The National”ın məlumatına görə, ötən ilin sentyabrında Səudiyyə Ərəbistanı ilə Pakistan arasında imzalanmış qarşılıqlı müdafiə sazişi İslamabadın bu prosesdəki rolunu vasitəçilikdən daha geniş müstəviyə çıxarıb.
Qəzetin mənbəsi bildirib ki, əgər Ər-Riyad Qırmızı dənizdə gəmiçiliyin təhlükəsizliyinin təmin olunması üçün yardım istəsə, Pakistan bu çağırışa biganə qala bilməyəcək. Hətta zərurət yaranacağı təqdirdə krallığın maraqlarının qorunması məqsədilə Pakistan Hərbi Dəniz Qüvvələrinə məxsus gəmilərin Qırmızı dənizə göndərilməsi də mümkün ssenarilərdən biri kimi qiymətləndirilir.