Bu gün Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə iclası davam etdirilib.
“Report”un məlumatına görə, Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesdə zərərçəkmiş qismində sahibkar Mübariz Məmmədov ifadə verib. O, istintaqa verdiyi ifadəsini təqsdiq edib. M.Məmmədov deyib ki, MTN binasında onu A.Çovdarov döyüb: "Döyüləndən sonra Mərkəzi Gömrük Hospitalında ürəyimdən əməliyyat olunmuşam".
İttiham aktına əsasən, M.Məmmədov Badamdar qəsəbəsində yerləşən 18 sot torpaq sahəsini satarkən A.Çovdarov onun müştərisi olub və zərərçəkmiş Rafiq Tağıyevin vasitəsilə həmin ərazini 600 min dollara almağa razılaşıblar. Bunun üçün də 300 min dollar beh verib. Lakin sonradan bəlli olub ki, torpağın iki sahibi var, biri M.Məmmədov, ikincisi isə Gənclər və İdman Nazirliyidir. A.Çovdarov işin içində başqa bir dövlət qurumunun olduğunu bildikdən sonra M.Məmmədovu otağına gətirdərək döyüb, işgəncə verib. Bu yolla M.Məmmədovdan behini geri tələb edib, sonra isə torpağın təmənnasız öz yaxın adamının adına keçirilməsinə nail olub.
Daha sonra məhkəmə iclasında Mərkəzi Gömrük Hospitalının həkimləri ifadə veriblər. Onlar bildiriblər ki, M.Məmmədovun ürəyinə stend qoyulub.
A.Çovdarovun vəkili Sadiq Rəsulov jurnalistlərə açıqlamasında söyləyib ki, müvəkkilinin səhhətində yenə problemlər yaranıb.
Günün ikinci yarısında davam etdirilən prosesdə zərərçəkmiş M.Məmmədovun epizodu üzrə iki sabiq MTN əməkdaşı dindirilib. Həmin şəxslər M.Məmmədovun MTN-in inzibati binasına gəlmələrindən xəbərdar olduqlarını söyləyiblər.
A.Çovdarovun vəkili Kamandar Nəsibov jurnalistlərə açıqlamasında qeyd edib ki, müvəkkili məhkəmədə onun barəsində keçirilən ekspertizadan narazı olduğunu deyib: "Məhkəmə bu barədə qərar çıxarmışdı ki, onun üçün xaricdən mütəxəsislərin gətirilməsinə icazə verilir. Lakin ekpertiza zamanı buna icazə verilmədi. Buna görə də Akif Çovdarov etiraz etdi. Müvəkilim bildiridi ki, ekspertiza formal olaraq keçirilir. Ekspertiza komissiyasının rəhbəri xaricdən gələn həkimlərin iştirakına icazə vermədi. Akif Çovdarov da buna etiraz olaraq həftənin üçüncü günündən aclıq aksiyasına başlayacağını dedi. O, məhkəməyə gəlməyəcəyini söylədi".
Məhkəmənin növbəti iclası fevralın 1-nə təyin edilib.
Qeyd edək ki, A.Çovdarov 2015-ci ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.
A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.
Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.