Suriyada 2024-cü ilin sonlarında hakimiyyət dəyişikliyindən sonra təxminən 1,7 milyon suriyalı qaçqın və 1,9 milyon məcburi köçkün doğma yerlərinə qayıdıb.
Ucnoqta.az xəbər verir ki, bu barədə BMT-nin Humanitar Məsələlərin Əlaqələndirilməsi İdarəsinin (OCHA) ReliefWeb informasiya xidməti BMT-nin Qaçqınlar üzrə Ali Komissarlığına (UNHCR) istinadən məlumat yayıb.
Bildirilib ki, Suriyada genişmiqyaslı qayıdış prosesi davam etsə də, ölkədə humanitar vəziyyət mürəkkəb olaraq qalır. 2024-cü ilin dekabrından etibarən təxminən 1,7 milyon qaçqın və 1,9 milyon məcburi köçkün geri dönüb.
Məlumata görə, ölkənin bir sıra bölgələrində vəziyyət hələ də qeyri-sabitdir. Hazırda Suriyada 15,6 milyon insanın humanitar yardıma ehtiyacı var.
UNHCR qeyd edib ki, dağıdılmış yaşayış evləri, xidmətlərə məhdud çıxış, sənədlərin rəsmiləşdirilməsində çətinliklər və iqtisadi problemlər geri qayıdanların cəmiyyətə davamlı reinteqrasiyasına mane olur.