Alimlər sakit musiqinin zehni yorğunluğu azaltmağa kömək etdiyini aşkar ediblər.
Ucnoqta.az xəbər verir ki, tədqiqatın nəticələri Applied Psychophysiology and Biofeedback jurnalında dərc edilib.
Tədqiqatda iki qrupa bölünmüş 30 tələbə iştirak edib. Əvvəlcə onlar yüksək səviyyədə konsentrasiya tələb edən 30 dəqiqəlik Stroop testini tamamlayıblar. Tapşırığı yerinə yetirdikdən sonra iştirakçılardan zehni yorğunluq əlamətləri qeydə alınıb.
Daha sonra bir qrupdan 20 dəqiqə ərzində rahatladıcı musiqi dinləmələri, digərindən isə tam sükutda qalmaları istənilib. Musiqi dinləyənlər daha az yorğunluq və daha tez konsentrasiyanı bərpa etdiklərini bildiriblər.
Elektroensefaloqramma məlumatları fərqləri təsdiqləyib: "musiqi" qrupundakı iştirakçılar normallaşmış ayıqlıq və idrak fəaliyyəti, yuxululuğun azaldığını göstəriblər.
Sükut qrupundakı tələbələr yorğunluq hiss etməyə davam ediblər.