Ailə, Qadın və Uşaq Problemləri üzrə Dövlət Komitəsi atasının işgəncə verdiyi 2017-ci il təvəllüdlü azyaşlı ilə bağlı məsələyə münasibət bildirib.
Ucnoqta.az xəbər verir ki, məsələ ilə bağlı APA-ya açıqlama verən Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu bildirib ki, məlumat daxil olan kimi azyaşlı sığınacağa yerləşdirib:
“Ailənin iki uşağı sığınacaqdadır. 2007-ci təvəllüdlü uşaq isə Lənkərandadır, orada çobanlıq edir. Bədəni yandırılmış qadın öz valideynlərinin yanındadır. Kişinin 2006-cı təvəllüdlü qeyri-rəsmi nikahda olan qızını isə sığınacağa yerləşdirmək üçün işlər aparılır. Hər şey Komitənin nəzarətindədir. İcra Hakimiyyətinin də bu məsələdən xəbəri var. Hazırda araşdırılma aparılır”.
Qeyd edək ki, Baş Prokurorluğun Mətbuat Xidmətinin böyük prokuroru Kənan Zeynalov deyib ki, Paytaxtın Xəzər rayon sakini – 2017-ci il təvəllüdlü azyaşlıya atası tərəfindən əzab verilməsi, onun 2006-cı il təvəllüdlü bacısının qanunsuz nikaha daxil olması, ötən ilin dekabr ayının sonlarında uşaqların anasının üzərinə əri tərəfindən qaynar su tökülərək xəsarət yetirilməsi faktları ilə bağlı Xəzər rayon prokurorluğunda Cinayət Məcəlləsinin bir neçə maddəsi ilə cinayət işi başlanıb.
O bildirib ki, cinayət işi ibtidai istintaqın aparılması üçün aidiyyəti üzrə rayon Polis İdarəsinin İstintaq Şöbəsinə göndərilib:
"Prokurorluq və polis əməkdaşları tərəfindən həyata keçirilmiş istintaq-əməliyyat tədbirləri nəticəsində azyaşlının atası, eləcə də on altı yaşına çatmayan qız ilə qanunsuz nikaha daxil olmuş şəxs cinayət işi üzrə təqsirləndirilən şəxs qismində cəlb edilib. İstintaq orqanının vəsatəti əsasında prokuror tərəfindən məhkəməyə təqdimat verilib. Hər iki şəxsin barəsində məhkəmənin qərarı ilə həbs qətimkan tədbiri seçilib. Hazırda istintaq-əməliyyat tədbirləri davam etdirilir".
K. Zeynalov qeyd edib ki, Ailə, Qadın və Uşaq Problemləri üzrə Dövlət Komitəsinə edilmiş müraciət əsasında “Təmiz Dünya Qadınlara Yardım” İctimai Birliyinin nəzdində fəaliyyət göstərən sığınacağa yerləşdirilmiş uşaqların vəziyyəti normaldır, psixoloq və sosial işçilər tərəfindən işlər aparılır.