Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı Xəzər dənizi sahillərində və Baş Mil-Muğan kanalında qanunsuz balıq ovlayan şəxslər saxlanılıb.
Xidmət rəsmisi Bəhruz Məhəmmədov bildirib ki, araşdırma zamanı brakonyerlərin Bərdə şəhər sakini Taleh Rəhimov, Neftçala rayon sakini Şərif Hüseynov olduğu müəyyən edilib, onlardan istifadəsi qadağan olunmuş ov alətləri və 1850 metr uzunluğunda sintetik tor götürülüb.
Faktla bağlı qanun pozucuları barəsində protokol tərtib olunub və qanunamüvafiq tədbir görülüb: “Eyni zamanda, Bakı şəhəri, Sahil qəsəbəsində qanunsuz ov edən şəhər sakini Ziyafət Məmmədov saxlanılıb və barəsində akt, protokol tərtib olunub”.
Xidmət rəsmisi onu da qeyd edib ki, Lənkəran rayonunun Boladi kəndində qanunsuz ovlanmış vəhşi quşların satışı ilə məşğul olan rayon sakini Əli Həbibov barəsində də qanunamüvafiq tədbir görülüb.